6 октябрьыште Марий Эл писатель ушем республикын Тӱвыра, савыктыш да калык паша шотышто министерствыжын полшымыж дене «Сылнымут шыже – 2021» республиканский семинар-совещанийым эртарен.
Ушештарена, икымше гана тыгай мероприятий кундемыштына кодшо курымысо 70-ше ийла кыдалне лийын. Тунамсе семынак кызытат семинар-совещаний самырык возгалыше-влакым да кумдан палыме сылнымут мастар-шамычым иктеш чумырен. Республикысе писатель ушемым вуйлатыше Светлана Архипован увертарымыж почеш, ты гана семинар-совещаний Марий Элын калык писательже Алексей Краснопёровлан пӧлеклалтын, тений шочмыжлан – 100 ий. «Адакшым 6-шо октябрь марий литературын классикше Сергей Чавайнын шочмо кечыже», – ушештарен тудо.
Йылмым, литературым да историйым научнын шымлыше В.М.Васильев лӱмеш марий институтыш погынышо усталык шӱлышан еҥ-влак дене вашлиймашыш Марий Элын Тӱвыра, савыктыш да калык паша шотышто министр Константин Иванов миен.
«Пытартыш жапыште самырык тукымлан, образованийлан кугу тӱткышым ойыраш кӱлмӧ нерген шуко ойлена да, те ужыда, мемнан тӱвыра министерстве ты шотышто кӱлешан ошкылым ышта. Сандене ончыкылык лач тендан кидыште, самырык-влак. Ме тыланда лектышан пашам тыланена», – каласен тудо.
Семинар-совещанийыш толшо ӱдыр-рвезе-влаклан поро тыланымашым тыгак кумдан палыме сылнымут мастар-влак Валерий Бердинский, Зинаида Ермакова, Анатолий Ишалин, тыгак Марий тӱвыра рӱдерым вуйлатыше Наталья Пушкина да молат ойленыт. Теве нунын кокла гыч иктыжын, Валерий Бердинскийын, ойжо тыгай лийын:
– Таче тендан чынжымак – кугу пайрем. Икымше гана тыгай «Сылнымут шыжыште» мый 80-ше ийла тӱҥалтыште лийынам. Тиде залыштак, ончылно, кумдан палыме писатель-влак шинченыт. Мемнан секций еда шеледеныт: «Прозо», «Поэзий», «Драматургий». Мый, мутлан, «Прозо» секцийыште лийынам. Мемнан произведенийым кумдан палыме еҥ-шамыч лончыленыт. Секцийым тунам Ким Кириллович Васин вӱден. Мый тунар самырыкше лийын омыл, возаш варашрак тӱҥалынам, кумло ий деч вара. Прозо шуко жапым йодеш, но тудын деч посна ок лий. Ме тунам илыш нерген чыным возаш тыршенна. Но тунам илыш чылаштынат икгайрак лийын, сандене, нелеш ида нал, манмыла парня гыч шупшын возаш логалын. Кумло ий эртен, тачысе илыш тугай огыл, садлан, мыйын шонымаште, кажне кечын ик ойлымаш дене возаш лиеш. Те возыза, сылнымутым йӧратыза да нигунамат вуйге компьютерыш, телефоныш ида «пуро» – книгам лудса!
Погынышо-влак ончыко лекше кажне гаяк еҥын тыланымашыже лач тыгай лийын. Чын, мыняр шуко лудат – тунар шинчымашет келгемеш, йылмет лывырга да возымо мастарлыкет кушкеш. Чыла тидым самырык-влаклан республикыште марла да рушла савыкталтше газет да журнал-влакын тӱҥ редакторышт ойленыт. Нунын коклаште «Марий Эл» газет ООО-н директоржо Александр Абдуловат лийын. «Ончыко» журналын тӱҥ редакторжо Игорь Попов «Кажне тыгай семинар деч вара у лӱмым вучена» манын. Марий книга савыктышым вуйлатыше Юрий Соловьёвын мутшо почеш, тений савыктен лукшаш йоча книга уке, сандене тудо ӱжмӧ семын ойлен: туныктышо-влак дене пырля возымым ямдылен, Марий книга издательствыш толаш да темлаш.
Мероприятийын кокымшо ужашыже секций еда шуйнен. Тудыжо ты гана нылыт лийын: «Марий поэзий да прозо», «Руш поэзий да прозо», «Курыкмарий литератур» да «Йоча литератур». Секцийлаште паша кузерак каен – газетын лишыл номерыштыже палдарена. Но ончылгоч каласена: тений руш йылме дене прозо шуко пурен.
Ушештарена, Эн сай произведений-влак «Дружба» ден «Эрвий» альманахлаште, «Ончыко», «Литера», «У сем» сылнымутан да «Кече/Солнышко» йоча журналлаште савыкталтыт.
Г.КОЖЕВНИКОВА
