Марий Элыште «ялысе» ешартышым налше пенсионер-влакын чотышт кугемын толеш.
Россий Пенсий фондын Марий Элысе органлаштыже пенсийыш «ялысе» стажлан выплатым ешарыме паша умбакыже шукталтеш.
Регионыштына тений икымше ныл тылзыште 1000 утла пенсионер «ялысе» стажлан ешарен тӱлымӧ нерген йодмашым пуэн. А тудыжым таче кечылан ялыште илыше, ялозанлыкыште 30 ий деч шагал огыл пашам ыштыше 9748 пенсионер налеш.
У льгото 2019 ий 1 январь гыч вийым налын. «Ялысе-влакын» шоҥгылык шотышто страховой пенсийышкышт пеҥгыдемдыме ешартыш выплатым да инвалидность шотышто страховой пенсийыштым тӱлымӧ паша материал негызеш тиде пашам йодмаш деч посна шуктымо. Кызыт 2019 ий 1 январь марте налме «ялысе стажым» пеҥгыдемдыше документым кондышо граждан-влакын пенсийыштым угыч шотлат. Тиде случайыште выплатым 2019 ий тӱҥалтыш гычак тӱлат.
Ешартыш выплатым налаш правам пуышо документым 2019 ий 1 январь деч вара пеҥгыдемдыме гын, пенсийым йодмашым пуымо деч вара шушаш тылзын икымше числаж гыч шотлен луктыт. Пашам ыштымым чарныше, 30 ий деч шагал огыл «ялысе» стажым погышо да ола гыч ялышке илаш куснышо пенсионерлан йодмашым Пенсий фондын верысе органышкыже пуыман. Паша гыч 2019 ий 1 январь гыч кайыме да «ялысе» стажлан выплатым тӱлымӧ нерген йодмашым июньышто пуымо годым пенсийым 1 июль гыч шотлен луктыт.
М.ИВАНОВА
