саламлымаш

У ий салам: МАРИЙ ТУРЕК

Эртыше идалык мыланна неле лийын, поснак – общепитлан. Эпидемийлан кӧра тусо предприятий-влак икмыняр жаплан петырналтыныт. Но районысо калыкым обслуживатлымаш чарнен огыл. Производство предприятий-влак – кинде завод, колбаса, шыл пелефабрикат, алкогольдымо йӱыш да кондитер цехла – тугак ыштеныт. Торгайыше предприятий-влак калыклан кочкышым ситарен шогеныт. Кевытче-влак чер шарлыме жапыште ик эн ончыл линийыште лийыныт манаш лиеш. Но аралалтме режимым сайын шуктен шогымыштлан кӧра неле пагытым чытен лектыныт да кызытат, угыч чер шарлыме жапыште, шкеныштым шекланен шогыде огыт керт. Тыгай неле пагытыште икымше пелийын итогшо почеш райпона тӱшка паша дене Марпотребсюз системыште икымше верым налын.

Ончыкыжат мӧҥгештме ок шу. Паша планна изи огыл: торгайыше предприятийлам уэмдаш, продукцийнан ассортиментшым пойдарен толаш, кевытдыме яллаште  сатум машина дене лектын ужалаш шонена. Таза гына кодаш ыле.

Сандене, шушаш У ий дене саламлышыла, шкенан пашаеҥна-влаклан, тыгак мемнан сатум налше чумыр калыклан эн ончычак пеҥгыде тазалыкым тыланем. Тек осал чер ӧрдыж гыч эрта да вашкерак чакна. Тек мемнам сакчына арала!

Э.З.Хайруллин,

Марий Турек райпо советын председательже

Опубликовать в Одноклассники

Добавить комментарий