Эртыше идалык неле лийын, эпидемий амал дене ик жаплан пашамат чарнаш логалын. А ме тылеч ончыч у производство зданийым пашаш колтен гына шуктенна ыле. Тидлан изи огыл кредитым налме. Но шогалмылан кӧра тудлан тӱлен кертын огынал. Чот тургыжланаш перныш. Пашам угыч тӱҥалаш йӧным пуымеке веле шӱлалтышна. Йӧра, кеч у производство зданийна кумылым нӧлтен. Тудо тоштыж деч кугурак, жапын йодмыжлан келшышырак, йӧнанрак, шокшырак да волгыдырак. Станок паркым уэмдышна. Утларак чапле да тӱрлӧ мебельым лукташ тӱҥална.
Ӱшанена, шушаш идалык лектышанрак лиеш, чарак иземеш. Осал чер чакна, налше шукемеш. Мебельна утларак еҥым савыра, шонена.
Тыгай шонымаш денак шкенан пашаче ешым, тудын лӱм дене чумыр районысо да республикысе калыкым шушаш У ий пайрем дене саламлем. Продукцийнат кумылдам савыраш полша, шонем. Йодмыда почеш кеч-могай мебельым ыштен пуэна да чаплым гына. Толза, йыҥгыртыза – ме тендам вучена. Ида черлане, пашада ушнен толжо, шонымыда шукталтше.
Д.А.Серков,
Шолэҥер посёлкышто мебель цехым вуйлатыше, индивидуальный предприниматель
