Параньга посёлкышто Кугу Отечественный сарын участникше-влакым шарныктыше обелискым олмыктеныт.
Тыгай темлымаш дене Ветеран-влакын районысо советышт поселкысо администрацийыш идалык ончычак лектын улмаш. Кугу Сеҥымашын 75 ияш лӱмгечыж вашеш ты пашам мучашлашак шоненыт. Обелискшым 1967 ийыштак шогалтеныт улмаш, сандене олмыктымо паша пеш лачеш толын.
Уэмдыме шарныктышым 1 октябрьыште почыныт. Тидлан пӧлеклалтше торжественный мероприятийыш калык шуко погынен. Амал деч посна огыл, вет шке жапыштыже Параньга район гыч сарыш 7 тӱжем наре еҥ шочмо эл верч кредалаш каен, тышеч 3765-ше пӧртылын огыл. А мемориал плиташ Параньга посёлко гыч сарыште вуйым пыштыше 552 салтакын лӱмжым возымо.
С.НОСОВА
Снимкыште: уэмдыме обелиск.
