Йошкар-Олаште у аллей ышталтын. Тудо Марий комсомолын 100 ияш лӱмгечыжлан пӧлеклалтын. 12 майыште комсомолын ветеранже-влак, иктыш чумырген, ты пашам ворандарен колтеныт.
Марий комсомолын шочмо кечыжлан 16 май шотлалтеш. Тудын вашеш шуко мероприятий палемдалтын. Нуным «Марий Эл Республикын комсомолжын ветеранже-влак» мер организацийышт эртара. Шошо да шыже пагытлан пушеҥгым шындыме, комсомол дене кылдалтше шарныктыш-влакым эрыктен тӱзатыме акций ятыр палемдалтын. Тыгак тӱрлӧ творческий конкурс, тунемше-влак дене вашлиймаш эртышаш. Библиотекылаште ончер ден книгам каҥашымаш, тематический кас-влак лийыт. А тӱҥ пайремже 16 майыште Йошкар-Оласе Сеҥымаш паркыште да Ленин лӱмеш тӱвыра полатыште эрта, «Йолташ-влакын вашлиймашышт» да лӱмгечылан пӧлеклалтше концерт лийыт.
Лӱмгече вашеш организаций тыгак у комсомол значокымат луктын. Тудым комсомол ветеран-шамычлан кучыктат.
Ынде Сеҥымаш паркым сылнештарыше у аллей деке пӧртылына. Тудым ышташ Марий Элысе комсомолын ветеранже-влакын организацийыштын советшын еҥже Леонид Гаранин темлен. Организацийым вуйлатыше Сергей Шареевын тыршымыж дене шонымаш илышыш пурен шуын. Ленин лӱмеш тӱвыра полат вуйлатыше комсомол ветеран Хаджимурат Гуцунаевын темлымыж почеш, аллейжым Сеҥымаш паркыш вераҥденыт. Ветеран-влак 18 пел канде кожым да 12 туйым шынденыт.
Нунын коклаште Йошкар-Оласе депутат-влак погынымашын председательже Виктор Кузнецов, Кугыжаныш Погын депутат Владимир Кожанов, философий науко доктор, профессор Анатолий Смирнов, Йошкар-Оласе ветеран-влак ушемым вуйлатыше Геннадий Мустаев да молат лийыныт. Кызытат нуно комсомол жапысе гаяк чолга улыт, кеч-могай пашаш кумылын ушнат. Мутлан, Анатолий Смирнов аллейым шындымашке Рита пелашыж дене пырля толын ыле. Шке жапыштыже нуно комсомол пашаштак икте-весым вашлийыныт, келшаш тӱҥалыныт, вара ешым чумыреныт. Комсомол путёвко дене сӱан путешествийыш каеныт. Таче марте ваш келшен илат. «Мо мемнан таче уло, могай кӱкшытыш шуынна, чыла тиде лач комсомол гыч тӱҥалын», – каласыш Рита.
Кажне комсомол ветеранже нерген посна каласкалаш лиеш. Нуно чыланат шке жапыште республикысе самырык толкыным вияҥдымаште чолгалыкым ончыктен. А тудо пагыт нерген сай шарнымашышт – нимучашдыме. Пушеҥгым шындаш толмо годымат икте-весе дене вашлияш йон лекмылан куанен, шке жапыштыже комсомол субботниклам кузе эртарымым шарналтеныт. Но пашам тӱҥалме деч ончыч, ик тат шып шоген, Озаҥыште лийше туткарыште колышо-влакым шарналтеныт.
Аллей тӱҥалтыште могай амал дене тудым ыштымым ушештарыше гранит кӱм пыштыме.
С.Носова
М.Скобелевын фотожо.
