12 декабрьыште Марий Эл Вуйлатыше Александр Евстифеев Юж транспорт федеральный агентстве вуйлатыше Александр Нерадько дене пашаче вашлиймашым эртарен, палдара Марий Эл Республик Вуйлатышын организаций да аналитике управленийже.
Нуно Йошкар-Оласе аэропорт нерген мутланеныт. Рашрак каласаш гын, тудын нӧлталтме-шичме полосажым федеральный казна гыч «Агентство гражданских аэропортов» ФГУП-ын балансышкыже кусарышаш нерген. Тидыже ончыкыжым ты объектым РФ-н «Транспорт системым вияҥдымаш» кугыжаныш программыш пурташ, вара аэропортын нӧлталтме-шичме полосажым уэмден тӧрлатышашлан проектно-сметный документацийым ямдылаш тӱҥалаш йӧным ышта.
Александр Евстифеев федеральный агентстве вуйлатыше дене Федераций Советыште Республикын кечыже-влакым иктешлыме дене келшышын вашлийын. Нуно республикын правительствыж ден Росавиацийын иквереш ыштышаш паша планыштым ямдылаш пунчалым луктыныт.
Ушештарена, республикыште транспорт инфраструктурым вияҥдыме йодышым Федераций Советыште Марий Элын кечыже-влакым эртарыме годым каҥашеныт. Юл кундем федеральный округышто таче кечылан лач мемнан аэропорт веле Россий Федерацийын вес субъектше-влак дене юж кылым ок кучо.
Л.Камалетдинова.