Культур» нацпроект полшымо дене Оршанке районысо Марково ялысе тӱвыра пӧрт у тӱсым налын. Уэмден олмыктымо культур учреждений идалык тӱҥалтыште шке омсажым почын.
Тошто пырдыжым кодымо
Паша дене тудо кундемыш мийыме годым вуйлатыше Александр Онучин порын вашлие да мучко ончыктен кошто, тӱвыра пӧртын пашаже да моло нерген радамын каласкалыш.
Тӱвыра пӧрт моткоч тошто оралтыште верланен. Тудым 1905 ийыште чоҥымо. Жапше годым тиде верыште имне вӱта, кермыч завод, школ спортзал да молат лийме нерген ойлат.
– Тиде – зритель зал. Ужыда, тудо кермыч дене оптымо кок пӧртым уша. Тыге ик кугу, кумда зданий лийын, – каласкала Александр. – Ӱмаште «Тӱвыра» нацпроект полшымо дене тудым тӱжвачын жаплан келшыше металл панель дене комыжлымо, леведышым уэш уэмденна, шокшым пуышо оборудованийым, электровоштырым вашталтенна, у мебельым, тул аппаратурым налынна, сцене вургемым, шторым ургыктенна, тыгак кинобудкым олмыктенна, олмешыже ялысе библиотекылан пӧлемым келыштаренна.
Чынжымак, зал кумда, волгыдо, пӱкен-влакым радам дене вераҥдыме, ик могыр пырдыжшым моткоч ойыртемалтшын келыштарыме.
– Олмыктымо годым оралтынан тошто улмыжым арален кодаш шонен, ик могыр пырдыжыште кермыч марте нӱжымӧ да сайын чиялтыме, а окна олмышкыжо тошто фотокартычке-влакым келыштарыме. Нунын гоч ялысе клубын ончычсо сынжым ужаш лиеш, – палемдыш вуйлатыше да ешарыш. – Волгыдо, поро шӱлыш дене озаланыше верыште пашам ышташ кумыл эшеат лекте, чонланат каньыле.
Мо оҥайже, тошто оралтыште…
Материалым умбакыже газетыште лудаш темлена…
А.БАЙКОВА
Авторын фотожо
