Тиде ой «Мунло» интеллектуал марафоныш чумыргышо ӱдыр-рвезе-влаклан лачак келшен толеш.
Марий тӱвыра рӱдерын кумшо гана эртарыме ты мероприятийышкыже Марий Элын районлаж гыч индеш команде чумырген: Марий Турек район Сардаял школ, Шернур посёлкысо 1-ше №-ан школ, Советский районысо Ӱшнур школ ден Ургаш лицей-интернат, Морко посёлкысо 1-ше №-ан школ, Медведево районын сборныйжо, Руэмысе шуко профилян лицей-интернат, Йошкар-Оласе 14-ше №-ан гимназий, У Торъял районын сборныйжо. Конкурс 17 ноябрьыште Усталык ушем-влакын пӧртыштышт лийын. Республикысе школлаште тунемше ӱдыр-рвезе-шамыч уш-акылыштым кум турышто ончыктеныт. Кажныштыже 10 йодыш лийын. Тыгак капитан-влакат посна конкурсышто таҥасеныт.
Икымше тур шочмо кундемын лӱмлӧ еҥже-влаклан пӧлеклалтын. Кокымшышто марий йылме да литератур дене кылдалтше йодыш-влаклан вашештеныт, а кумшышто марий йӱлам палымыштым ончыктеныт.
Йодыш-влак чынжымак оҥай да ойыртемалтше лийыныт. Конкурсын заданийжым Марий тӱвыра рӱдерын пашаеҥже-шамыч дене пырля эксперт-влак иторий науко кандидат-влак Н.Попов ден С.Свечников, педагогике науко кандидат, доцент В.Михайлов ямдылаш полшеныт. Нунак жюриште шинченыт.
Тыге сеҥышыш Советский район Ӱшнур школын командыже лектын. Нунылан таҥасымашын кубокшым кучыктеныт. Кокымшо верым Морко посёлкысо 1-ше №-ан школын тунемшыже-влак налыныт, кумшо вер дене Советский район Ургаш лицей-интернатын ӱдыр-рвезыже-шамыч палемдалтыныт.
— Сеҥымашланна моткоч куаненна. Конкурслан йӱдшӧ-кечыже ямдылалтынна. Кугу таум ИКН туныктышына Светлана Витальевна Таныгиналан ойлена, — куанен каласыш Ӱшнур командын чолга рвезыже Алеша Анисимов.
Л.ШАБДАРОВА.
Р.Николаеван фотожо.
