УВЕР ЙОГЫН

Уфаште Юл кундем федеральный округысо поисковый отряд-влакын слётышт эртен

7 октябрьыште Уфаште Юл кундем федеральный округысо поисковый отряд-влакын эртарыме тыгай слётыштышт Марий Эл гыч «Воскресенье» команде чыла коклаште 9-ше верым налын. Республикна гыч тушко чылаже 22 еҥ миен. 

Финалист-влакым Россий президентын Юл кундемысе федеральный округысо полномочный представительже М.Бабичын алмаштышыже И.Паньшин саламлен.
– Команде дене пашам ыштен моштымыда, налме шинчымашда илышыштыда сай корным ойыраш полша манын ӱшанем, – ойлен тудо. – Сай: сар жапыште вуйым пыштыше, геройлыкым ончыктышо-влакым шарнена. Нуным пагалышаш улына. Те, самырык тукым, кугезе коча-кованан чапыштым аралыше да шкем пагалаш йӧршӧ лийын кушкыда. Эллан кӱлешан пашам ыштеда.

Кок кече жапыште слётын 350 утла участникше тӱрлӧ конкурсышто, военно-исторический викториныште, военный археологийыште, ориентированийыште, топографийыште вийыштым тергеныт. Тыгак саркуралым палыме шотышто тестым эртеныт да кажне команде, лӱдыкшыдымылык техникым шотыш налын, икымше медицине полышым пуэн моштымыжым ончыктен.

Игорь Паньшин участник-влакын ямдылыме выставкыштым ончен, поисковик-влак дене кутырен да ты пашам, толкыным Юл кундем федеральный округышто пырля вияҥдаш кӱлмӧ йодышым тарватен.

Поисковый отряд-шамычын слётыштыжо сеҥышыже команде-влаклан диплом ден шергакан пӧлекым кучыктеныт.

Форумын Гран-приже Оренбург областьын командыжлан логалын.

Е.Эшкинина.

Опубликовать в Одноклассники

Добавить комментарий