Тений февральыште Йошкар-Ола воктенысе коммерческий огыл ик сад товариществыште мланде участке ден пӧртым нальым. Вараже умылышым: закон дене пеҥгыдемдыме кугыжаныш пошлиным шукырак, мланде участкылан 350 теҥге олмеш 2000 теҥгем, тӱленам. Палынем ыле: утыждене тӱлымӧ оксам пӧртылтен кертам мо?
А.Кошаев.
Йошкар-Ола.
Йодышлан Марий Элыште Росреестр виктемын пресс-службыштыжо тыге вашештышт:
– Россий Федераций Налог кодексын 333.40 статьяжын положенийже дене келшышын, тӱлымӧ кугыжаныш пошлиным ужашын але тӱрыснек пӧртылташ лиеш. Тиде радамыш утыждене тӱлымӧ кугыжаныш пошлинат пура.
Кугыжаныш пошлинын утыждене тӱлымӧ (налме) суммыжым пӧртылтымӧ нерген йодмашым тӱлышӧ еҥ юридически кӱлешан действийым шуктышо органыш (должностной лицалан) возышаш. Кугыжаныш пошлиным тичмашнек пӧртылтымӧ годым йодмаш пелен тӱлымӧ документын подлинникшым пыштыман, ужашын пӧртылтымӧ годым – копийжым.
Икманаш, тендан случайыште утыждене тӱлымӧ оксам пӧртылтымӧ нерген йодмашым Марий Элыште Росреестрын виктемышкыже (Йошкар-Ола, Чехов урем, 73-шо «а» пӧрт) пуыман, пеленже тӱлымӧ документын копийжым, оксам пӧртылташлан банк реквизитым пыштыман.
М.ИВАНОВА
