Тыге маналтеш Йошкар-Оласе художественный училищын студентше ден преподавательже-влаклан июньышто Морко районышто эртаралтше пленэр.
Кум арня жапыште самырык сӱретче-влак районышто икмыняр верыш миен коштыт. Нуно Н.И.Казаков лӱмеш сылнымут да краеведений тоштерыште, Кугу Шӱргӧ ялыште XIX курымысо аралалт кодшо арвер усадьбыште лийыт, тыгак Нылгудо, Кӱчыкэҥер, Памашсола, Вончӱмбал, Эҥерсола, Овдасола, Нужа, Чӱкшӧ яллаште, Унчо да Арын селалашке лектын коштыт.
Кодшо арняште Морко районысо Унчо селаш «Сӱан пайремым» ончаш мийыме годым я ик вере, я вес вере сӱретлен шогышо ӱдыр-рвезе-влакым ужым. Воктекыракышт лишеммеке, чия пуш нерым чыгылтылаш тӱҥале.
Пӱкеныште сылне марий вургеман Алевтина Федорова шинчен, а тудын ваштареш самырык сӱретче-влак, ӱдырамашын портретшым сӱретленыт.
— Ме чылаже латкудытын улына. Кажныже чонлан лишыл темым ойырен налын. Иктылан пӱртӱс сӱрет лишыл, весылан – натюрморт, а мыланна портрет жанр утларак келша, — паша гутлаштак ойлат училищын кумшо курсыштыжо тунемшыже-влак Антон Соколов ден Таисия Фоминых. — Портретым пытарымеке, ме пӱртӱс сӱретым ышташ каена. Таче мыланна кок пачаш пиалан кече. Молан манаш гын мемнан пленэр почылтын да эше моткоч сылне, ойыртемалтше пайрем гӱжла. «Сӱан пайремыш» тӱрлӧ коллектив, тӱрлӧ вургемым чиен толын, а ик ялыште тыгайым ужаш куанле. Унчо кундемат ойыртемалтше, мотор. Теве тыштат, Янык памаш воктене, пеш сӧрал. А калыкше мыняр шуко чумырген!
— Шукак огыл, кум шагат веле тарваныде шинчыман, — пелештыш Алевтина.
Тудо Унчо селаште ила. Морко посёлкышто тӱвыра пӧртыштӧ тӱрызылан тырша, тыгак Шлань ялысе культур пӧрт пелен «Усталык памаш» кружокым вуйлата. Туштат тудо кумылан-влакым тӱрлаш туныкта. Кидмастарын пашажым Унчо кундемыш толшо финн-угор уна-влак эреак налын каят.
Жап эрта, а сӱретче-влакын портретышт, пӱртӱс сӱретышт да моло жанр дене ыштыме пашашт курымла дене илаш тӱҥалыт. Лач нунын гоч тиде але вес кундемын моторлыкшо, тусо калыкын тӱвыраже, йӱлаже, ыштыш-кучышыжо раш почылтеш.
Палемдыман, художник-влаклан пленэр «Унчо – Финн-угор тӱнян культур рӱдыверже» про ект дене келшышын эртаралтеш.
А.БАЙКОВА
Авторын фотожо
Снимкыште: А.Соколов, Т.Фоминых портретым сӱретлат.
