УВЕР ЙОГЫН

Унчо кумалтыш гыч сӱрет — сеҥыше

«Hiite Maja» Эстонийысе целевой учрежденийын увертарыме «Шнуй пӱртӱс ото-влак» тӱнямбал конкурс иктешлалтын.

Тений тудо латкокымшо гана эртен. Тушко 9 гыч 67 ияш марте 200 наре автор ушнен. Чылаже 777 фотосӱрет пурен, тышеч конкурсын условийжылан 550 келшен толын, палемдат организатор-влак. Фотом 20 элыште 40 наре тӱрло калыкын шнуй отылаштыже ыштыме. Финн-угор-влак деч 12 лийын. Сеҥышыш лекше автор-влакым 30 ноябрьыште Тартушто, Эстонийысе Естественный науко университетын актовый залыштыже, палемдаш тӱҥалыт.

Тӱнямбал фотоконкурсын 100 евро кугытан тӱҥ премийжым РИА увер порталыште пашам ыштыше фотокореспондент Алексей Насыров сеҥен налын. Тудо фотом Морко районысо Унчо кумалтыш годым ыштен.

«Родо- тукым калык-влак» категорийыште премийым (300 евро) индеш ияш Юлиана Салиева сеҥен. Тудо тений шыжым аваж дене пырля Башкортостанысе Комбыял  кӱсотыштыжо эртыше мер кумалтышыште лийын. Юлиана Кугу  Собой Соказа школышто нылымше классыште тунемеш. 

С.НОСОВА

Снимкылаште: А.Насыровын «Юмо-влак коклаште» да Ю.Салиеван «Йодмаш» фотопашашт.

 Снимкым конкурсын веб-сайтше гыч налме.

Опубликовать в Одноклассники

Добавить комментарий