Шке жапыште уроклаш куржталмыштым мондышо але тудым ынде уныка-шамычлан гына ышташ полшышо илалше еҥ-влак угыч шинчымашым погаш толыныт.
Октябрьыште Марий Турек посёлкышто верланыше Ялозанлык механизаций техникумышто «Ший ийгот» школын у тунемме ийже тӱҥалын. Тидлан пӧлеклалтше торжественный мероприятийыш районысо тӧнеж ден организацийлам вуйлатыше-влакат толыныт.
Тений школыш 37 «тунемше» толын, нунын кокла гыч визытше – икымше гана.
Мероприятийым «Марий Турек муниципальный район» муниципальный образованийым вуйлатыше, Депутат-влак погынымашын председательже Н.Зангирова почын. Тудо илалше-влаклан сайын тунемаш, поян шинчымашым погаш тыланен.
Школын тунемме кок ийжым проектын кураторжо-Комплексный рӱдерын директоржо Н.Шамуратова иктешлен. Тудо факультет-влакын преподавательышт Ж.Ивановалан, С.Бутаковалан, В.Смирновалан, З.Мурзанаевалан, И.Сбоевалан тауштымашан серышлам кучыктен. «Ветеранын сурт-печыже» конкурсым Л.Меркушева иктешлен, сеҥыше-влакым чапкагаз да пӧлек-шамыч дене палемден.
А «Разгуляй» ансамбль пайрем кумылым эшеат нӧлталын.
«Ший ийгот» школын черетан занятийже 25 октябрьыште Марий Турек посёлкын Рӱдӧ книгагудыштыжо лиеш.
М.ИВАНОВА.
