Марий Элым вуйлатыше Александр Евстифеевын эртарыме совещанийыште калыкын у коронавирус инфекций деч прививкым ыштыктымыж нерген мутланеныт.
А.Евстифеевын палемдымыж почеш, республикыштына COVID-19 дене черланыше-влакын чотышт ончычсо семынак кугу. Пандемий тӱҥалме деч вара лабораторийыште тергыме йӧн дене 18 тӱжем утла еҥын инфицироватлалтмыжым пеҥгыдемдыме. Ты чот гыч пелыже коронавирус дене ешыштыже але лишыл еҥже-шамыч коклаште черланен. Колышо-шамычынат чотышт изи огыл.
«Кучем вакцинаций шотышто мере-влакым ыштен. Ынде, у тунемме ий тӱҥалмым, республикыште илыше калыкын республик деч ӧрдыжтӧ эртарыме отпуск гыч мӧҥгӧ пӧртылмыжым шотыш налын, тудым умбакыже шуйымо йодышым лончылыман. Таче вакцинаций рӱдерын пашажым эше кок тылзылан шуяш оксам ойырымо нерген распоряженийыш кидпалем пыштышым. Но мемнан задачына – калыклан вакцинацийын кӱлешлыкшым умылтарыме пашам вияҥдаш», – палемден регионым вулатыше.
Правительстве председательын икымше алмаштышыже Михаил Васютин Йошкар-Оласе Сеҥымашын ХХХ идалыкше лӱмеш тӱвыра полатыште верланыше вакцинаций рӱдерын кӱлешлыкшым палемден – тушто шуко еҥ прививкым ыштыкта.
«Кызыт коронавирус деч тӱшка иммунитетым ышташ кӱлеш, но южо еҥ рӱдерыш толшо-шамычым традиционный религийын вуйлатышыже-влакын мутыштым колышташ ӱжеш. Черке-влак республикнан чыла муниципальный образованийыштыже улыт, ӱшаныше-шамычат регион мучко илат, сандене тидым каҥашаш темлем», – каласен тудо.
Эпидемический процессым саемдымашке, черланыше-влакын чотышт кугемын кертмым шижтарымашке виктаралтше мероприятий-влакым умбакыжат эртараш кӱлеш. Тидым тӱшка иммунитетым формироватлыме деч посна ышташ огеш лий, палемден А.Евстифеев.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
