27 ноябрьыште «Арена» манежыште мини-лапта дене Российын кубокшо верч таҥасымаш тӱҥалын. Тушто Удмурт, Башкортостан, Марий Эл республикла, Тюмень область гыч ӱдырамаш, тыгак пӧръеҥ команде-влак вийыштым тергат.
Марий Эл Минспорттуризмын пресс-службыжын палемдымыж почеш, турнир 30 ноябрь марте шуйна.
Пытартыш жапыште «Арена» манежыште спортын тӱрлӧ видше дене Россий кӱкшытан таҥасымаш-влак эртаралтыт. Мутлан, ӱмаште, апрельыште, мини-лапта дене Российын чемпионатше лийын. Тунам ӱдырамаш команде-влак коклаште эн талыже Пошкырт кундем гыч лийын гын (Марий Элын чапшым Провой кундем гыч сборный арален), пӧръеҥ-шамыч коклаште – Оренбург область.
Е.Эшкинина.
