КУЛЬТУР ДА ИСКУССТВО ФОЛЬКЛОР

Тӱрлӧ калык коклаште – «Мурсескемат»

Кужэҥер районысо Йывансола тӱвыра пӧрт пеленысе калык лӱмым нумалше «Мурсескем» фольклор ансамбль Архангельскыш тӱрлӧ калыкын тӱвыраже да йӱлаж дене палдарыше «Гармоничная Россия» фестивальыш миен коштын.

Тушко Башкортостан, Коми, Карелий, Удмурт республикла, Вологда область, Ненецкий автономный округ да Йӱдвел Осетий гыч усталык коллектив-влак мастарлыкым ончыктеныт.

«Мурсескем» ансамбль Новдвинск олаште илыше-влакым сылне куштымаш, весела такмак-влак дене куандарен. Тиддеч посна коллектив вуйлатыше, Марий Эл культурын сулло пашаеҥже Евгений Каменщиков шӱвырым шоктен. Тидыж дене тусо калыкым ӧрыктарен улмаш.

Тушко миен толмо моткоч келшен, сандене кужу жаплан шарнаш кодеш. Коллективна дене кум концертым ончыктенна, чылаштыжат зал тич погынышо калык шокшын вашлийын. Тиддеч посна «Малые Корелы» тоштерыште лийынна, – миен толмышт нерген кумылын каласкала Евгений Анисимович. – Мемнан костюм тусо калыклан моткоч келшен, кӱкшӧ акым пуэныт. Теве уэш тушко каяш ямдылалташ вел тӱҥалман, мемнам ноябрьыште эше ик гана ӱжыныт.

Коми гыч мийыше делегацийлан Женян гармоньым шоктымыжо пеш келшен, сандене чылан пырля шогалын, сылне сем почеш мурен-мурен куштенна, – мутланымашке ушныш ансамбльын участницыже, Евгений Анисимовичын пелашыже Вера Алексеевна.

А.БАЙКОВА

Опубликовать в Одноклассники

Добавить комментарий