«Шушаш кече сайрак лийже манын, шке полшо!» Волонтёр-медик-влакын 28 октябрь гыч 1 ноябрь марте эртыше тӱнямбал форумышт лач тыгай лозунг-шамыч почеш эртеныт.
Иваново олаште лийше мероприятий 50 эл гыч 500 наре участникым чумырен. Нунын коклаште Марий кугыжаныш университетын студентше ден преподавательже, тыгак «Волонтёр-медик-влак» всероссийский мер толкынын регионысо пӧлкажын еҥже-влак лийыныт.
Форумышто тазалыкым аралыме сферыште эн сай волонтёр паша-влак, тыгак сеҥымаш-шамыч ончыкталтыныт. Уло тӱнялан кумдан палыме спикер-влак оҥай лекцийым лудыныт, семинарым да тренингым эртареныт. Тидын деч посна волонтёр-медик-влакын IV всероссийсий съездышт лийын.
Марий кугыжаныш университетын студенткыже А.Казанкина тиде кугу мероприятий шотышто тыге каласыш: «Форум моткоч пайдале лийын. Ик вере тынар шуко кӱлешан шинчымашым тетла нигуштат от нал».
Г.КОЖЕВНИКОВА
