Пӱрӧ район Кужнур ялыште илыше марий Михаил Кутлусатов ынде ятыр ий тӱмырым ышта.
Михаил Павлович шке жапыштыже эн ончыч агрономлан тунем лектын. Варажым ялозанлык вуйлатыше марте шуын. Образований сферыштат кужу жап тыршен. Школ директорат лийын, верысе администрацийымат вуйлатен. РСФСР просвещенийын отличникше кызыт сулен налме канышыште гынат, ончычсо семынак мер илышыште чолгалыкым ончыкта. Пӱрӧ районысо марий-влакын верысе калыкле тӱвыра автономийыштын еҥже. Тудын тыршымыж денак кызыт Кужнур ял республикыште увертарыме «Айык села» конкурсышто участвоватла да финалышкат шуын.
Мастар еҥын ыштыме тӱмыржӧ дене Российыште веле огыл, Финляндийыште, Эстонийыште, США-штат шоктат. Эсогыл Алтайысе шаман-влак семӱзгаржым налын каеныт. Кодшо курымын индешлымше ийлаштыже тудо тӱмырым ышташ тӱҥалын. Вара эркын семӱзгарым шке технологийже почеш сӧрастараш, марий тамгам, тӱрым келыштараш тӱҥалын.
Тудо тыгак пу гыч пӱчкеда, сӱретла, бубеным, моло арверым ышта. Ятыр фольклор коллектив тудын кидпашаж дене пайдалана. Шке жапыштыже М.Кутлусатов тӱмырым ыштыме дене кылдалтше проект-влак дене Башкортостан Республик президентын, Россий президентын грантыштым сеҥен налын. Тудын семӱзгарже Башкортостанысе национальный тошерыштат аралалтеш. Кидпаша ончержат ятыр вере эртен. Марий Элысе творческий коллективлаштат тудын тӱмыржым кырат.
Пытартыш жапыште Михаил Павлович марий шӱвырымат ышташ кумылаҥын, но ончыч тудо ты семӱзгар дене шокташ тунемын. Таклан огыл М. Кутлусатов Марий Элысе тӱвыран сулло пашаеҥже чап лӱм дене палемдалтын. А шукерте огыл тудлан Башкортостанысе тӱвыран сулло пашаенже чап лӱмым пуэныт. Таче марте илалше кидмастар самырык тукымым кидпашалан туныкта, мастар-класс-влакым эртара.
С.Носова
Статьям интернетысе материал-влак негызеш возымо.
Снимкыште: М.Кутлусатов
Фотом М.Кутлусатовын почмо соцлаштыклаж гыч налме.
