УВЕР ЙОГЫН

Тыште тунеммем дене кугешнем

10 ноябрьыште Свердловск областьысе Красноуфимск педагогике колледжлан 100 ий темын.

       Тиде жапыште тушто 18 тӱжем ен шинчымашым налын. Тудо уло Российлан да СНГ-ш пурышо эл-влаклан тунемме кадрым ямдыла. Мутлан, Свердловск областьысе Красноуфимск, Арти, Ачит районлаште пелыж наре туныктышо-влак лач тышеч лектыныт. Лӱмгечым 15 ноябрьыште палемденыт. Выпускник-влакым колледжын директоржо Антон Третьяков шкежак вашлийын. Пайрем программе пеш поян лийын. Шуко оҥай вашлймаш мемнам вучен. Колледжын тоштерыштыже педагогике пашан ветеранже, СССР, РСФСР просвещенийын отличникше Маргарита Усанина дене мутланаш йӧн лийын. Урал сӱретче-влак ушемын еҥже, колледжын туныктышыжо Евгений Николаевын персональный ончерже почылтын. Свердловск областысе законодательный собранийым вуйлатыше ятыр выпускниклан да кызыт колледжыште туныктышылан Чап грамотым, Тауштымашан серышым кучыктен. РФ Кугыжаныш Думын депутатше Зелимхан Муцоевын лӱмжӧ дене саламлымашым лудын пуэныт да Чап грамото-влакым кучыктеныт. Башкортостан Республикысе Курултай вуйлатыше дечат саламлымаш лийын.

Муат уке, пайрем эртыме залын икымше радамыштыже педагогике пашан ветеранже-влак шинченыт. Коледжын туныктышыжо-шамычлан тауштымо шуко ой йоҥгалтын. Тунемме учрежденийын историйже 1919 ий кеҥежым тӱҥалын.  Башкирийын Дувано-Кущинский ревкомжын пунчалже почеш, ончыч марий учительский семинарий ышталтын. Варажым 10 ноябрьыште Башкортостанысе Наркомпросын пунчалже почеш 10 ноябрьыште икымше подготовительный группым чумыреныт да туныкташ тӱҥалыныт. Тиде кечак Красноуфимск педагогике колледжын шочмо кечыжлан шотлалтеш. Тудын икымше директоржо Гавриил Еферемов лийын.  

Мыят тиде колледжым 1968 ийыште тунем лектынам. Санденак пырля тунемше икмыняр лӱмлӧ йолташ-влак дене пырля ты пайремыш миенам. Арам огыл. Курымаш лӱмгечым палемдыме мероприятийыште лач тыште тунеммем дене кугешнен шинченам.

В.А.БАКЕТОВ.

Свердловск область.

Снимкыште: Красноуфимск педколледжым 36 ий вуйлатыше В.В.Гордеев; паремыш толшо уна-влак.

Ю.Грязнован фотожо.

 

Опубликовать в Одноклассники

Добавить комментарий