Идалыклан ик гана 8 март вашеш «Саскавий» марий ӱдырамаш ушем шкенжын веле огыл, моло ӱдырамаш-влакланат пайрем шӱлышым ешараш полша. Тудын тыршымыж дене теният 5 мартыште Марий самырык театрыште «Тый улат мыланем ныжыл йӱр»концерт эртыш. Таклан огыл пайрем касын эпиграфшылан шке жапыштыже Василий Павловын йоҥгалтарыме мурыж гыч корнылам ойырен налме, вет кажне гаяк пӧръеҥ шке йӧратыме ӱдырамашыжым таҥастараш сылне деч сылне шомакым муэш.
А ты кастене пайремыш толшыжат утларакшым лач ӱдырамаш-шамычак лийыныт. Нуным марий эстраде мурызо, кок марий театрын пӧръеҥ артистышт шке мастарлыкышт дене куандареныт, пеледыш дене пырля шуко куан татым пӧлекленыт. Кушто эше иканаште тынар шотан да талантан пӧръеҥ-влакым ужат да нунын деч тынар поро шомакым да сай тыланымашым колат. Чынжымак, залыште шинчаш да шкем ӱдырамаш семын аклыме айдеме семын шижаш куанле ыле. Шомак гоч веле огыл, кажне мурыжак лач ӱдырамашлан пӧлеклалтын да чоным вӱчкен.
Мутлан, Вадим Красновын йоҥгалтарыме да марий ватым чапландарыме мурыжак мом шога. Таклан огыл ик жап Марий Эл Радио гоч эре ты мурым йоҥгалтараш йодыт ыле. Але Марий Элын сулло артистше Олег Логинов мурыштыжо ӱдырамашым кава, чевер кече, ныжыл муро денат таҥастарыш. Дмитрий Афанасьевын авалан пӧлеклыме мурыжат чоныш возо. Виктор Апталиковын пӧръеҥын ӱдырамашым кузе йӧратен кертмыж нерген мотор да виян йӱкшӧ дене йоҥгалтарыме мурыжат залыште шинчыше кажне еҥым «ылыжтыш», очыни. Пайрем концертын сценарийжым возышо Геннадий Гордеевлан ӱдырамаш-шамыч лӱм дене таушташ гына кодеш, чоннам шулыктарышда.
М.Шкетан лӱмеш кугыжаныш национальный драме да Марий самырык театрын рвезыштын койышыштым ончен йӧратет. Эшежым нуно кажныже гаяк пеш сылнын мурат. Таклан огыл пеш кӱчык жапыште чапым налынат шуктеныт. Мутлан, Марий Элын калык, РФ-ын сулло артистше Иван Смирновым ме ынде шукертак мурышо артист семын палена да аклена гын, самырык артист-влак Иван Соловьев, Алексей Юнусов, Игорь Антропов, Акпарс Иванов тудым «поктенак» толыт манашат лиеш. Сценыш саламлаш лекше кажне пӧръеҥже талантан. Марий Элын сулло артистше Роман Алексеевын йоҥгалтарыме «Йӧратем йӧратыде» мурыжын кажне шомакшымат чон вошт колтен колыштдежат ок лий, очыни…
Марий ӱдырамаш-влакым сцене гыч Марий Эл Правительстве председательын икымше алмаштышыже Михаил Васютин да Марий самырык театрын художественный вуйлатышыже Олег Иркабаев шокшын саламлышт. Мо эше оҥайже: сценыш лекше кажне пӧръеҥ шке выступленийже деч вара залыште шинчыше ик ӱдырамашлан пеледышым кучыктен да поро шомакым ойлен. Икманаш, чылажат ты касыш толшо ӱдырамаш-влакын кумылыштым нӧлтен.
«Саскавий» ӱдырамаш ушем вуйлатыше Людмила Кошкинат сцене гыч саламлыш, пайремым эртараш полшышо пӧръеҥ-влаклан тауштыш. Ушем лӱм денак поэтессе да журналист Татьяна Иванова Пчёлкинамат пел курымаш лӱмгечыж дене саламлышыжла кугу пеледышан шовычымат пидыктыш.
Палемден кодыман, пӧлекше ты кастене ятыр лийын. Мутлан, фойеште Йошкар-Ола, Звенигово, Волжский, Советский, Оршанке районла гыч толшо кидмастар-влак шке пашаштым ончыктеныт да ужаленыт, сандене кажныже шке аважлан, пелашыжлан, ака-шӱжарлан пӧлекым налын каен кертын. Спонсор-влакын полышыштан кӧра (нунышт чыланат ӱдырамаш-влак лийыныт) концерт деч вара шампанскийымат подылаш, гармонь сем почеш марла мурен кушталташат йӧн лийын.
С.НОСОВА
И.Речкинын фотожо
