25 декабрьыште регионын тазалыкым аралыме аланыштыже историеш кодшо кугу событий лийын – Республиканский клинический больницын патологоанатомический отделенийыштыже клеткын молекулярно-генетический патологийжым шымлыме шотышто референс-лабораторий почылтын. Тыгайже Юл кундем федерал округышто эше лийын огыл.
«Лабораторий гистологий шымлымашын циклжым мучаш марте шукта. Тидыже медик-шамычлан диагнозым клетке марте рашлык дене шындаш йӧным ышта, – у лабораторийым официально почмо годым палемден регионын тазалыкым аралыме министрже Марина Панькова. – Тудын полшымыж дене Марий Элыште илыше-влак клетке марте шушо таргетный манме терапийым налын кертыт, да тӱжем дене пациентын илышыжым арален коден сеҥена. Республикысе калыклан онкологий – ынде приговор огыл. Тиде лабораторий мыланна шуко пациентын тазалыкшым арален кодаш, илышыжым шуяш, калыкым ешыш да пашаш пӧртылташ йӧным ышта».
Патологоанатомический отделенийым вуйлатыше, республикын тӱҥ патологоанатомжо Артём Зуев мероприятийыш толшо-влакым лабораторий мучко экскурсий дене коштыктен, материально-технический базым ончыктен.
ПЦР-лабораторийыш таче кечылан пытартыш модельлан шотлалтше кок приборым чылт яра конден шындыме. Оборудованийым пӱтынек гаяк автоматизироватлыме, но тудын пашаже да пуымо результатше кӱкшӧ квалификациян медицине персонал дене чак кылдалтыныт. Тидымак шотыш налын, лабораторийын пашаеҥже-шамыч кызыт обязательный йӧн дене тунемыт, тренингым эртат да шымылыме посна йыжыҥлаште пашам ышташ палемдалтыт.
Кызытсе жаплан келшыше прибор-влак полшымо дене сакыр диабет, миокардын инфарктше, онкологий гай социально-кӱлешан черым рашемдыме шотышто науко шымлымашым эртараш кугу йӧн уло.
Иквереш ямдылыме лабораторийым почмо кечынак Марий кугыжаныш университетын ректоржо Михаил Швецов ден Республиканский клинический больницын тӱҥ врачше Андрей Глазырин пашам пырля ыштыме нерген келшымашыш кидпалыштым пыштеныт.
Палемдыман, МарГУ-н медицине факультетше пашам ыштыме вич ий утларак жапыште, а шушаш ийын тудо «Эмлыме паша» специальность дене икымше врач-влакым туныктен луктеш, медицине кадрым ямдылыме кӱшыл тунемме заведений-влак коклаште сай велым чапланен шуктен. Факультетыште тунемше ӱдыр-рвезе-влак Россий кӱкшытан олимпиадылаште да конкурслаште анатомий да хирургий йодышла дене ик гана веле огыл сеҥышыш лектыныт. Мутлан, тений МарГУ-н студент-медикше-влак «АНАТОМ и Я» II Моско международный универсиадыште айдемын анатомийже шотышто сеҥыше-влак радамыш логалыныт. Да ынде ончыкылык врач-шамыч практикым у лабораторийыште эртен, квалификацийыштым нӧлтен да шинчымашышт ден моштымашыштым пашаште терген кертыт.
М.ИВАНОВА
Авторын фотожо
