11 февральыште Москва воктенысе Солнечногорский районышто Болкашино ял тураште Марий Эл гыч пашам ышташ мийыше 5 пӧръеҥын капыштым муыныт. Кызыт тиде туткар кузе лийме шотышто Москва областьысе Солнечногорск оласе прокуратуржо тергымашым эртара. Ты факт шотышто уголовный телам тарватеныт.
Кызытеш пален налме почеш, пӧръеҥ-шамыч чоҥымо объектыш пашам ышташ пураш миеныт улмаш. Тидлан Болкашино ял деч тораште огыл верланыше производственный площадке кумдыкышто улшо строительный вагоныш илаш пуреныт.
Кызытеш рашемдыме почеш, ик версийже – илыш дене чеверласыше-влак плиташте кочкаш шолтымышт годым баллон гыч лекше газым шӱлен ситареныт. Вес версийже – бытовко газовый горелке манме дене ырыкталтын. Тудыжым газ баллон деке ушымо улмаш да тушечак газ лектын. Туткар лийме верым ончен савырныме годым следователь-шамыч кок газ баллоным да кок плиткым ужыныт.
Тыгак тушто яра кум арака кленчам верештыныт. Сандене пӧръеҥ-шамыч спиртан йӱыш денат аярген колен кертыныт манме версий уло.
Илыше кодшо ик еҥ ден колышо вич пӧръеҥжын кӧ улмыштымат кугарнялан рашемден шуктеныт. Колышо-влак коклаште эн самырыкше Морко район Нурӱмбал ял гыч 34 ияш Дмитрий Дмитриев лийын. Тыгак илыш дене чверласыше-шамыч теве кӧмыт улыт: 41 ияш Рафик Сабиров, 45 ияш Андрей Рыбаков, 46 ияш Алексей Степанов да 58 ияш Леонид Егоров.
А Александр, шкенжын ойлымыж почеш, окна воктене малымыжлан да тушеч юж сайынак пурымылан кӧра илен кодын. 11 февральыште эрдене 8 шагат эрталтымеке помыжалтмекше да напарникше-шамычын тарваныде кийымыштым, а вараже колышо улмыштым ужынат, тидын нерген прорабыштлан каласен. Тудак вараже азап лийме нерген кӱлеш службылашке увертарен.
Азап лийме верыш ик эн ончыч ты олан прокуроржо Артем Шишов ден полиций начальник Александр Сивых миеныт, палдара Москва областьын прокуратуржын пресс-службыжо.
Тергымаш умбакыже шуйна.
Л.Камалетдинова
