УВЕР ЙОГЫН

Туныктышын лӱмжӧ – ава деч вара

Тыге ойленыт «Мый да шочмо йылмым туныктышем» конкурсыш погынышо ӱдыр-рвезе-шамыч йӧратыме педагогышт нерген. Марий тӱвыра рӱдерын эртарыме таҥасымашыже Марий тиште кечылан пӧлеклалтын да МарНИИЯЛИ-ш шочмо йылмым йӧратыше-влакым чумырен.

Тиде гана конкурсышто кум секций пашам ыштен. Икшыве-шамычын шымлымашыштым жюри кум номинацийыште аклен: «Йӧратыме туныктышем», «Икымше туныктышем», «Нуно негызым ыштеныт».  Эн шуко доклад икымше секцийыште йоҥген.

Йоча-шамычын пашаштым лудмо годым туныктышыштым уло чон дене йӧратымышт вигак шижалтын. Жап шагал лийын гынат, кажныжым колыштын шуктеныт, но жюрилан эн сайжым садак ойыраш кӱлын. Тыге «Йӧратыме туныктышем» номинацийыште Марий Турек район Карлыган школын тунемшыже-влак З.Саляхова, М.Федотова кумшо верыш лектыныт. Нунын удмуртла яндарын мутланен моштымышт, туныктышыштым пагален каласкалымышт чоным вӱчкен. Звенигово район Красногорский школын тунемшыже Д. Бариева  артист койышыжлан кӧра кокымшо верым налын. А сеҥышыш Морко район Унчо школ гыч А.Дмитриева лектын. Тудын туныктышыжо Людмила Александрова нерген каласкалымыжым чылан шулен колыштыныт.

«Икымше туныктышем» номинацийыште ӱдыр-рвезе-влак тыглай лудын каласкален огытыл, кажныже шымлымашыжым муро, куштымаш, сем дене пойдарен. Теве Морко район Шӱргыял школын тунемшыже-влакын муралтымышт чылаштын кумылыштым савырен. А кокымшо верыш Морко район Волаксола школын тунемшыже Анна Степанова лектын. Икымше верым  Медведево район Руш Кукмарий школ гыч  Арина Белова налын. Тудын тӱҥалтыш класслаште туныктышо С.Белова нерген чоным пыштен каласкалымыже кажнын чонжым тарватен.

«Нуно негызым ыштеныт» номинацийыште таҥасыше-влакат мастарлыкыштым тичмашын почын ончыктеныт. Оршанке район Кугунур школ гыч Никита Козловын тӱмырым пералтымыже тавалташ кумылым луктын. Семӱзгаржым пырля тунемме йолташыже Кирилл Рябинин ачаж дене пырля ыштен. Жюри тиде школын командыжым аклыде коден огыл. Тыге  Н.Козлов, К.Рябинин, В.Черёмушкина кумшо вер дене палемдалтыныт

Кокымшо верым жюри Йошкар-Оласе 1-ше №-ан школын тунемшыже Д.Мифтаховалан пуэн. Сеҥышыш рӱдоласе 17-ше №-ан школын тунемшыже-шамыч Д.Винокуров дене М.Калачёва лектыныт.

Жюри конкурсым иктешлыме годым йоча-влакын йылмыштым йӧратымыштым, йӱлаштым жаплымыштым палемден коден. Мутат уке, икшывын чонышко тидым шыҥдарымаште кугу пашам туныктышо-влак ыштат, санденак тиде мероприятийыште нунылан таум шуко гана ойленыт да тиде сомылым ворандарымаште умбакыжат тыршаш тыланеныт.

Л.ШАБДАРОВА.

М.Скобелевын фотожо.

 

Опубликовать в Одноклассники

Добавить комментарий