22 апрельыште Марий Элым вуйлатыше Александр Евстифеев тул пижын кертме лӱдыкшӧ пагытым илен эртарыме йодышлан пӧлеклалтше совещанийыште участвоватлен. Тудым видеокылым кучымо йӧн дене Россий Федерацийын пӱртӱс ресурс да экологий министржын алмаштышыже – Чодыра озанлык федеральный агентствым вуйлатыше Иван Валентик эртарен.
Чодырам тул деч аралымаште погынышо йодышлам тєрлышашлан законодательствыш ятыр тєрлатымашым пуртымо. Тиде эн ончычак эл мучко тул ваштареш кучедалме режимын правилышкыже вашталтышым пуртымо нерген РФ правительствын пунчалже. Ты документ дене ялозанлык кӱлешлыкан мландыште, запасыште улшо мландыште, пасулаште, тыгак автомобиль корно воктенысе полосалаште, кӱртньыгорно, путепровод воктенысе аралтыш зонышто кукшо шудым йӱлаташ чарыме. Кызыт тул деч аралалтме шотышто профилактике пашалан кугу тӱткышым ойыраш кӱлеш, палемден И.Валентик.
Шуко ий эскерыме почеш, Марий Элыште шошо-кеҥеж жапыште пожар лийын кертме лӱдыкшӧ жап апрельын кокымшо-кумшо декадыштыже толеш. Тидлан кӧра А.Евстифеев «Марий Эл Республикын территорийыштыже тул ваштареш кучедалме ойыртемалтше режимым палемдыме да граждан-влакын чодыраште лиймыштым да лесничестве-влакын чек кєргыштышт улшо чодырашке транспорт средстве дене пурымым шагалемдыме нерген» Марий Эл Правительствын пунчалжым пеҥгыдемден. Тиде режим 27 апрельыште вийыш пура.
Чодырасе пожарым йӧртымӧ пашам виктарен колтышашлан иктешлыше планым ыштыме. Тудын дене келшышын, чодыраште пожарым йӧрташ чылаже 3824 еҥан группировкым ыштыме, тушко тыгак 642 пожарный технике, пожарный обстановкым шымлыме ик самолет да пилотдымо чоҥештылше 9 аппарат пурат. Кӱлеш лийме годым чодыраште тулым йӧртымашке чылаже 4,5 тӱжем еҥан добровольный пожарный формирований-влакым ушаш лиеш.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
