Россий МЧС-н Марий Элысе Тӱҥ управленийжым вуйлатыше генерал- майор Александр Малкин Кугыжаныш пожарный службын Марий Элысе управленийжын пожарныйже Дмитрий Антоновлан «За отвагу на пожаре» медальым кучыктен.
Пожар ноябрь кыдалне Кокшайскыште, кум пачеран ик пачашан пӧртыштӧ, ылыжын улмаш. Тидын нерген пожарный частьыш увер вич шагатат пелылан кастене пурен. Кок еҥан пожарный караул туткар лийме верыш кудалын. Миен шумыштлан тул пачер кӧргыштат йӱлен, шикш шоген. Дмитрий пачерыште еҥ улмо нерген пошкудо-влак деч пален налын. Шуко шоныде, тудо пачерыш пурен да туткарыш логаше еҥым ваче ӱмбалныже нумалын луктын. Тулым писын йӧртен кертыныт. Дмитрий Антоновын лӱддымылыкшым Россий МЧС-ын наградыж дене палемденыт.
С.Носова.
