УВЕР ЙОГЫН

Тул азапым чактарышылан – «сулло» лӱмым

29 октябрьыште Марий Элын шымше созыв Кугыжаныш Погынжын латкумшо сессийже эртен. Депутат-влак 13 йодышым лончыленыт, Марий Эл Республикын 11 законжо ден Кугыжаныш Погынын 16 пунчалжым пеҥгыдемденыт.
Республикысе законодательствым федеральныйлан келыштараш палемдыме 13 йодыш гыч утларакше верысе кучемын, тазалыкым аралыме да капкыл культур ден спорт сфер, кугыжаныш ден муниципальный службо, мировой судья-шамычын пашаштым, кугыжаныш погым приватизироватлыме радамым виктарыше нормативный акт-шамычым тӧремдыме дене кылдалтын.
Тыге, депутат-влак Марий Элым вуйлатыше А.Евстифеевын ик тылзе ончыч правительстве председательын икымше алмаштышыжлан палемдыме Александр Анатольевич Гречихом должностьыш пеҥгыдемденыт. Регионнан Гражданский обороно да калыкым аралыме комитетшын «Марий Эл Республик пожар охранын заслуженный пашаеҥже» почётан у лӱмым пуаш тӱҥалаш темлымыж дене ик йӱкын келшеныт. Шуэн вашлиялтше (орфанный) чер радамым кумдаҥденыт, тушко эше кум диагнозым пуртеныт. «Марий Элыште капкыл культур да спорт нерген» законыш «физкультур-спорт сообществе», «корпоративный спорт», «школысо спорт лиге» у умылымаш-влакым пуртеныт, нине статусым налме негызым, права ден обязанностьым да тулеч молым палемденыт. Йошкар-Олаште пассажир-влакым тӱшка транспорт дене шупшыктымо пашам организоватлыме шотышто полномочийым 2021 ий 1 январь гыч регионын Транспорт да корно озанлык министерствыжлан пуаш пунчалыныт. Тыгак, южо муниципальный образованийыште ийготыш шудымо ӱдыр-рвезе-шамычын палынак шукын улмыштым шотыш налын, Йошкар-Олаште, Волжскышто да Медведево районышто КДН специалист-влакын чотыштым ик единицылан кугемдыме.
Моло вашталтыш нерген Марий Эл Кугыжаныш Погынын официальный сайтыштыже пален налаш лиеш.

М.ИВАНОВА

Опубликовать в Одноклассники

Добавить комментарий