Йошкар-Олаште «Марий вургем пайрем унала ӱжеш» межрегиональный конкурс кышкарыште Йылмым, сылнымутым, историйым научно шымлыше В.М.Васильев лӱмеш институт «Финн- угор калык тӱвыраште тукым гыч тукмыш вончышо тӱрлымашын ойыртемже» шанче-практике семинарым эртарен.
Инстутут директор Евгений Кузьминын палемдымыж почеш, тыгай семинарым эртараш жап толын шуын. Каласен кодыман, тӱрлымӧ паша шотышто тыглай практический семинар-влакым республикысе Калык усталык рӱдер ок эртаре огыл, мастар-шамычынат шукын улыт. Но лачшымак науко кӱкшыт гыч ты мастарлыкым иктешлыше тыгай мероприятий лийынжат огыл манаш лиеш. Эшежым семинарыш Марий Эл гыч веле огыл, Мордовий, Чуваший гыч кидмастар-влак толыныт. Нунын пашаштым весат уша: тӱрыштышт икгайлык шуко. Ӧраш нимолан, вет ме пошкудо семын илена. Ик тӱржым весе деч ойыраш, лачшымак ты але вес калыкын манын рашемдаш, тыглай еҥлан куштылгыжак огыл. Эсогыл участник ден докладым ыштыше-влакын чиемыштым онченат тидым палемдаш лиеш. А вургемышт кажныжын пеш сылне да поян. Чыла тидын нерген мутым налше-влак ойленыт да шке пашашт дене палдареныт. Семинар жапыштак кидмастар-влакын ончерышт пашам ыштен.
Мутлан, марий тӱрызӧ Ираида Степанова кызыт, Россий Президентын грант конкурсыштыжо участвоватлымылан кӧра, Россий мучко марий-влакын тӱшкан илыме кундемлашкыже коштын да нунын тӱрысӧ орнаментыштым шымлен. Пеш поян материалым чумырен. Тидын нерганак семинарыште ойлен.
Вес тале тӱрызына Лидия Веткина, тыгак Россий Правительствын «Душа России» премийжын лауреатше, марий тӱрын ойыртемже дене палдарен. Келшыш Мордовий гыч толшо мастарын, республикысе тӱвыран сулло пашаеҥже Татьяна Гвоздеван, пашажат, ойлымыжат. Мокша да эрзя тӱр-влак нерген каласкалыш. Чуваш калыкын тӱрлеман вургемжым эсогыл «модель-влак» подиумышто коштмо семын ончыктышт.
Тӱрлӧ регион гыч толшо мастар-шамычлан тыгай вашмутланымаш, тӱрым тӱрлымӧ пашам шанче кӱкшыт гыч ончалмаш пайдале лиймым докладчик-влак шкештат ойырен каласышт. Калык-влакын тӱрыштым арален да ты пашам вияҥден колтымаште тургыжландарыше йодыш-влакат улыт. Поснак самырык тӱрызӧ-влак йӱлам шотыш налдымыштым чылан гаяк палемдышт. Таклан огыл, Евгений Кузьмин ден Марий Элын тӱвыра, савыктыш да калык паша шотышто министрын алмаштышыже Галина Ширяева финн-угор калык-влакын тӱрыштым наций-влакын культурный кодышт семын палемдышт. Ожно тӱр тыглай илышысе вургемым сӧрастараш гына кучылталтын гын, кызыт тудо йӧршеш у кӱкшытыш нӧлталалтын да вес семынрак аклалтеш.
С.НОСОВА
Снимкыште: ончер шинчам «йымыктарен».
М.Скобелевын фотожо.
