24-25 мартыште Озаҥысе Келшымаш пӧртыштӧ шочмо йылме ден литературым туныктышо-влакын «Туган тел» всероссийский конкурсышт иктешлалтын.
Тушко Татарстанысе да Российысе икмыняр регионышто татар, руш, башкир, марий, мордва, одо, чуваш, иврит йылмым туныктышо-влак ушненыт. Чылаже 15 регион гыч участник-влак лийыныт. Финалыш 34 туныктышо лектын. Нунын коклаште кок марий еҥ лийын: иктыже Татарстанысе Кукмор районысо Творческий вияҥмаш да гумманитарный образований рӱдерын пашаеҥже Ирина Родыгина, весыже Агрыз районысо Кӧлегеш школ гыч Серафима Николаева.
Участник-влаклан шке нерген эссем возаш, национальный костюмым, шкем туныктышо-влакын наставникышт семын ончыкташ логалын. «Марий туныктышо ӱдырамаш-влак финалыште поснак койшышыт, чиемышт дене дене ойыртемалтыныт», — палемдыш конкурсын жюриштыже лийше марий шанчызе Руслан Бушков. А конкурсын гран-прижым Озаҥысе 39-ше №-ан школышто татар йылмым туныктышо Суюмбика Салихова сеҥен налын.
С.Носова.
Снимкыште: участник-влак.
Р.Бушковын фотожо.
