УВЕР ЙОГЫН

«Троллейбус транспорт» предприятий ик эн виян пашам ышта

Таче Йошкар-Олаште «Троллейбус транспорт» муниципальный предприятий ик эн виян пашам ышта манына гын, йоҥылыш огына лий. Кажне кечын тудын пашаеҥже-влак индеш маршрут почеш 50 тӱжем наре еҥым шупшыктат. 

Рӱдолаште троллейбус-влак 1970 ий гыч кудалышташ тӱҥалыныт. Тиде жапыште нуно, чынжымак, ӱшанле, лӱдыкшӧ огыл улмыштым ончыктеныт да кызытат тыгак: водитель-влак паша режим почеш тыршат, кудалме графикыштым шекланат да эн тӱҥжӧ – корно правил-шамычым эскерат. 2017 ийыште нуно чылаже 17 миллион наре пассажирым шупшыктеныт, тыге предприятий 140 миллион теҥге наре налогым тӱлен.

Кызыт ола мучко калыкым шупшыктен кертше 120 троллейбус уло, нунын кокла ийготышт – 28 ий. Водитель-влак шотышто каласаш гын, чылаже 261 еҥ тырша да, мут толмашеш, нунын коклаште ӱдырамаш-влакат улыт.

Предприятий умбакыжат сайын пашам ыштыже манын, ӱмаште Йошкар-Ола администраций 2021 ий марте шуйнышо муниципальный программым ямдылен. Тудын дене келшышын  ГЛОНАСС спутник навигаций базеш транспортым обслуживатлыше мониторинг системым илышыш шыҥдарыме. Лач тиде программе полшымо дене льготан категорийыш пурышо еҥ-влаклан субсидийым пуаш тӱҥалме.  А ончыкыжым троллейбус паркым уэмдаш, линий-шамычым чоҥаш, тыгак пассажир-влакын оксам тӱлымӧ йӧныштым автоматизироватлаш палемдыме.

Г.Кожевникова.

Опубликовать в Одноклассники

Добавить комментарий