ТАЗАЛЫК

Тора да шерге улат, йот эл!

Йот эллашке чарак деч посна да лӱдде миен толаш манын, COVID-19 деч вакцинироватлалташ ямде улшо путешественник-влакын чотышт кугемын толеш. Тидым Туту.ру рашемден.
Туту.ру сайтын март тӱҥалтыште эртарыме у йодыштмашыштыже 2237 еҥ участвоватлен. Тиде чот гыч 10 процент респондент, Европыш корным почыт гын, вакцинироватлалташ ямде улмыжым каласен, 4 процент еҥ теҥызыш миен толмо верч прививкым ыштыкташ келшымыжым палемден, 8 процент еҥ кеч-могай йот элыш миен толшашлан процедурым эрташ кумылым ончыктен. Тыгеракын, йот элыш миен толшашлан у коронавирус инфекций деч прививкым ыштыкташ кӱлеш гын, тидлан 22 процент россиянин ямде. Сентябрьыште тиде показатель 19 процент лийын.
Вакциным ойырен налме дене кылдалтше сӱретат вашталтын. 8 процент респондент прививкым кызытак ыштыкташ ямде, но йот элыште ыштен лукмо вакциным вуча. Сентябрьыште элыштына могай вакцине лиеш, тугай дене прививкым ыштыктыме нерген 18 процент еҥ ойлен.
Путешественник-влак кокла гыч пеле утла (52 процент) ужашыже прививкым ыштыкташ кумылан огыл, тыгодымак тиде тӱшка гыч 18 процент еҥ вакцинацийым уже эртен.
Эртыше ий декабрьыште 29 процент путешественник тыге вашештен: «Прививкым ыштыктымеш лучо нигушкат ом кай». Путешествий деч ончыч да вара анализым сдатлаш кӱлмӧ йодмаш 5 процент респондентым корныш тарваныме деч чарен шогалтен.
19 процент россиянин отель деч ӧрдыжкӧ лектын кошташ чарымым шотыш налеш. Йот элыш мийымеке да мӧҥгӧ пӧртылмеке, карантиныште лияш кӱлмӧ годым 18 процент респондент лучо нимогай путешествийыш огеш кай. 9 процент еҥ QR-код дене ынеж регистрироватлалт. 4 процент респондент тугай верыш огеш кай, кушто комендант шагатым увертарыме, кафе ден ресторан-влакым петырыме, музей-шамыч пашам огыт ыште. 1 процент путешественниклан театр ден кинотеатр, аквапарк ден йоча аттракцион-влакын пашам ыштымышт кӱлешан.

М.ИВАНОВА

Опубликовать в Одноклассники

Добавить комментарий