Звенигово районысо Какшамарий ялыш пурымеке, Октябрьский уремыште пурла велне шинчалан вигак моткочак ойыртемалтше сурт-оралте логалеш. Рашрак каласаш гын, пече гоч вуйыштым луктын сакыше сурткайык ден янлык-влак. Агытан, пырыс да пий пуйто кажне толшым-кайышым, пурышым-лекшым «эскерат».
Пырысше гын «онча» веле огыл, эше пуйто ала-кушто колбасам муын да, пече гоч писынрак кудывечыш тӧрштен, авызлынеже! Чыла тиде такше сӱретлыме веле, но кенета да торарак гыч ончалмаште, ну, ялт илышылак койыт! Шонен муашат кӱлеш вет тыгайым!
— Печым тыге сӧрастараш, ойыртемалтше сыным пурташ лиймым пелашем Интернетыште ужын да ыштен пуаш йодын. Андрей эргына аважын йодмыжым тений шукерте огыл шуктен да, тевыс, ынде такше оҥайынак коеш, — палдарыш суртоза Евгений Самуилович Николаев.
Кумданрак — «Марий Эл» газетын
2017 ий 28 октябрьыште лекше номерыштыже лудын кертыда.
Любовь Камалетдинова.
М.Скобелевын фотожо.
