САМЫРЫК ТУКЫМ

Товло кече дене!

Йӧратымаш. Тиде волгыдо шижмашлан тӱнямбалне мыняр пайрем пӧлеклалтын! Католик-влак шнуй Валентин кечым палемдат, руш калык историйыш Пётр да Феврониян кечышт пурен, а марий-влак шукерте огыл  Товло кечым палемдаш тӱҥалыныт.

Кумдан палыме Википедий интернет энциклопедийыште тыге палемдыме: «Радиом колыштшо-влак коклаште йодыштмаш эртаралтын, кузе тиде пайремым лӱмдаш. «Йӧратымаш кече» лӱм 14 февраль дене кылдалтын, «Марий йӧратымаш кече» – шотлан ок тол. Ты жапыште «Марий Эл» газетыште Санян Вачи (В.Пектеев) дене «Чоным пыштен ыштыме паша чоным огеш кошто» интервью лектын. Тушто кумдан палыме мурызо, артист, режиссёр Санян Вачи ик тошто мутым шарналта — товло — чын йӧратымаш: «Йӧратымаш але тошто марла — товло, тӱрлӧ сынан… Платон кузе ойлен: кап ден кап ваш шупшмаш ажгыным шочыкта, чон ден чон ваш шупшмаш гыч икте-весым шижын умылымаш шочеш, уш-акыл гоч икте-весым пагалаш тунемат. Пӧръеҥ ден ӱдырамаш коклаште нине кум куат иканаште улыт гын, тиде чын йӧратымаш — товло».

Ты кечым 5 апрельыште палемдаш икмыняр ий ончыч Сергей Карпов темлен. Ты амаллан кӧра кок ий почела пайрем концертымат эртарен. Теният шагал огыл паша ышталтын. Мутлан «Мари-Рекордс» продюсер рӱдерын йодмыж почеш сӱретче Любовь Ткаченко стикер-влакым ямдылен.  Нуным https://t.me/addstickers/TOVLOKECHE телеграмм каналыште муаш лиеш.  Шкетан театр «Товло кече але Сопром ватым кычалеш» концертым ончыктен. «Марий Эл» радио конкурсым  эртарен. «Икмыняр ий ончыч «Марий Эл Радио» Товло кечым увертарен ыле. Тудым 5 апрельыште палемдаш С.Карпов ден В.Протасов темленыт. Молан манаш гын 1938 ий  5 апрельыште сценыште икымше гана Салика спектакльым модын ончыктеныт. Эчук ден Саликан йӧратымашыжым марий калык ик эн виян да яндар йӧратымашлан шотла. Тиде шонымаш дене теният ме «Йӧратымаш» мутым кучылтде, йӧратымаш нерген кузе эше каласаш лиеш» конкурсым увертаренна», – палдарыш самырык радио вӱдышӧ Жанна Федорова.

Йолташ-влак, айста 5 апрельым календарьыштына йошкар чия дене  палемдена. Вет лишыл еҥлан «йӧратем» мутым каласаш нигунам уто огыл. А тудын кумылжым нӧлташ Товло кече сай амал.

О.МОШКИНА

Опубликовать в Одноклассники

Добавить комментарий