УВЕР ЙОГЫН

Тидым палыман Пашадарым «конвертыште» налыда – нелылыкыш логалыда

Марий Элыште южо работодатель паша ойпидышым ыштыдеак, пашадарым «конвертыште» тӱлаш кумылан, палемда Марий Эл Республикын Паша да калыклан пашаверым ситарыме департамент.

Но, тудын умылтарымыж почеш, пашадарым тыге налше пашаеҥ шарнышаш: тиде йӧн паша законодательствым пудыртымаш веле огыл, тиде ончыкыжым тудлан нелылыкымат луктын кертеш.

Пашашке налме радамым закон дене келшышын шуктыдымыжлан кӧра  работодатель тиде пашаеҥым сулымо пенсий оксаж деч посна кода. Тидлан кӧра пашам ыштыме жапше страховой стажышкыже огеш пурталт да  пенсий кугытшат изи лиеш.

Производствышто туткар лиймеке але профессий дене кылдалтше иктаж чер авалта, пашаеҥ жаплан пашам ыштен кертдымышке савырна гын, тидлан, тыгак пашадыме шотышто, отпусклан тӱлалтше, коллективный договорышто да нормативный актлаште палемдыме социальный гарантий выплатым налаш праваже огеш лий.

Тыгай пашаеҥ банк кредитым, пачерым налме годым социальный налог вычетым налаш йӧн деч посна кодеш.

Пашадарым «конвертыште» налше пашаеҥ-влак весымат шарнышаш улыт: физический лицан доходшылан налогым тӱлымаш шкенжын ответственностьшо лийын кодеш. Ала-могай амал дене работодатель тиде оксам кусарен огыл гынат, тиде пашаеҥым ответственность деч огеш утаре. Налогым палемдыме жапыштыже огеш тӱлӧ гын, пашаеҥым уголовно мут кучаш шогалтен – 100 тӱжем теҥге штрафым тӱлыктымаш гыч 3 ий марте эрык деч посна кодымешке шуктен — кертыт.

Налогым иземдаш шонен, пашадарым «конвертыште» тӱлымым кызыт Россий правительстве посна контрольышто куча. Тыгай фактым тӱжваке лукмо шотышто паша республикыштат кая.

 

Пашаеҥ-влаклан теве мом ышташ темлалтеш:

— паша договорыш кидпалым пыштыде, пашам ышташ тӱҥалман огыл. РФ Паша кодексын 67-ше статьяж дене келшышын, работодатель, пашаеҥым налмекше, тудын дене кум паша кече деч вараш огыл письменный формо дене трудовой договорым ыштышаш;

— трудовой договорышто пашадарын чын кугытшо ончыкталтшаш. Кидпалым пыштыман кокымшо экземплярым работодатель пашаеҥлан пуышаш. Тиде документ пашадар кугытын доказательствыже лиеш;

 — работодатель премийым пуаш сӧра гын, оксам официально тӱлышаш. Тидым тергаш работодатель деч 2-НДФЛ справкым йодын кертыда;

— пашадар ик тылзе жапыште кажне пел тылзе деч шуэн тӱлалтшаш огыл;

— паша кечысе нормым тӱрыс шуктышын ик тылзаш пашадарже илен лекташ кӱлшӧ эн изи пашадар кугыт деч изи лийшаш огыл. 2019 ий 1 январь гыч тиде  кугыт 11 280 теҥге.

 

Паша законодательствым да моло нормативный правовой акт-влакым шуктымо кугыжаныш надзорым Марий Элыште республикысе Паша кугыжаныш инспекций эскера. (Йошкар-Ола, Ленин проспект, 24а №-ан пӧрт. Телефон: 8 (8362) 45-16-14. Электрон адрес: trud-mari-el@mail.ru).

 

Паша законодательстве нормым пудыртышо работодатель-влак нерген кугыжаныш (муниципал) кучем органлашке тыге увертараш лиеш:

— Марий Эл Республикын Паша да калыклан пашаверым ситарыме департаментын «шокшо линийышкыже» тыгай телефон дене йыҥгыртыман: 8 (8362) 41-40-77;

dtzntrud@gov.mari.ru.

 

Работодательда Пенсий фондыш оксам  кусара мо, могай кугыт страховой взносым колта – тидым индивидуальный лицевой счетым терген кертыда.

Шке пенсий счетын состоянийже нерген уверым тыге пален налаш лиеш:

— илыме але паша вер шот дене Пенсий фондын территориальный отделенийышкыже миен але ПФР-ын www.pfrf.ru официальный сайтыштыже вераҥдыме личный кабинетыште;

— кугыжаныш услугын www.gosuslugi.ru интернет-порталже гоч.

Л.Камалетдинова

Опубликовать в Одноклассники

Добавить комментарий