«Санкт-Петербург» Россий футболын историйыштыже эн кужу жап чоҥалтын. Негызым 2007 ийыште пыштыме. Тудо – Российыште ик эн шерге, тачысе саманлан келшен толшо стадион. Тиде спорт сооружений почылтман да петыралтшан леведышыж дене моло деч ойыртемалтеш. Сандене тушто кеч-могай игечыште матчым, тӱрлӧ мероприятийым эртараш лиеш. Тӱжвал тӱсшӧ дене космический корабльым шарныкта.
Зданийын кӱкшытшӧ – 79 метр, 9 пачашан;
Пӧлем-влакын кумдыкышт – 287,6 тӱжем квадратный метр;
Футбол пасун кумдыкшо – 9840 квадратный метр;
Футбол пасум шӱкен лукташ да мӧҥгеш кораҥдаш лиеш, нелытше – 8400 тонн;
Стадионыш 69 тӱжем еҥ ончаш толын кертеш. 2017/2018 ийыште «Зенит» командын матчлаштыже 56196 ончышо лийын.
Тӱнямбал чемпионат жапыште стадионышто тӱшка матч-влак эртаралтыт. Тыгак ик полуфинал да кумшо верлан матч-влак лийыт, а конфедераций-шамычын кубокшо верч таҥасымаште – 57268 еҥ.
Е.Эшкинина.
