Потребительын праважым илышыш пурташ полшышо кугыжаныш увер ресурсым ыштыме.
Кугыжаныш увер ресурс операторын пашажым шуктышо Роспотребнадзор палемдыме ресурсыш ( zpp.rospotrebnadzor.ru) интернет сеть гоч чыла еҥлан яра пурашсай йӧным ыштен.
Уверым пашан ойыртемжым шотыш налын шеледыме, вераҥдыме материал шотышто универсальный поискым пуртымо. Раздел-влак Россий Федерацийын субъектлаже-влак шотышто улыт, нунын коклаште – Роспотребнадзорын Марий Элысе виктемжын материалже-влакат.
Ресурсышто тыгай сынан материал-влакым муаш лиеш:
— ӱчашымаш лекме годым потребительын шке праваж верч порядке почеш шогымыжо;
— конфликтан ситуаций-влакым ончымо пример-шамыч;
— документын формыжо (претензий, исковой йодмаш да тулеч моло);
— сатум налме, услугым пуымо дене кылдалтше чӱчкыдын вашлиялтше йодышлан вашмут;
— потребительын праважым аралыме аланыште икте-весе кокласе кылым шотыш кондымо нормативно-правовой акт-влак;
— Россий Федерацийыште потребительын праважым аралыме нерген ий еда ыштыме кугыжаныш доклад ден программе-влак, нунын илышыш пуртымо нерген увер;
— потребительын праважым аралыме шотышто суд практикын материалже-влак, операторын, верысе кучем органын але мер ушемын ушнымышт дене потребительын праважым аралыме нерген делам ончымо иктешлымаш шотышто лукмо суд акт,
— потребительын праважым аралыме аланыште поснак таче кечылан кӱлешан увер.
Кугыжаныш увер ресурсын «Виртуальный приёмный» модульыштыжо потребитель-шамыч потребительын праважым аралыме, сатун качествыже да лӱдыкшыдымылыкшӧ, паша ден услугым пуымо аланла дене кылдалтше увер шотан серышым коден кертыт.
«Обязательный йодмашлан келшен толдымо продукций» модульышто Россий Федерацийыште, ты шотыштак Марий Элыште рашемдыме тыгай сатум пален налаш йӧн уло.
М.ИВАНОВА
