Студотряд-влакын кечыштлан пӧлеклалтше пайремыште уста ӱдыр-рвезым палемденыт. Нунын кокла гыч иктыже – лаштыкнан тачысе унаже Диана Иванова. Тудо Шернур район Йошкар Памаш ялеш шочын-кушкын. Кызыт Марий кугыжаныш университетыште физико-математический факультетыштыже программирований да системный анализ направлений дене нылымше ий шинчымашым пога. Диана тыгак спорт дене кылым куча.
– Кызыт тый студотряд толкынышто чолгалыкет ончыктет… Тышко кузе ушненат?
– Студотряд нерген 2017 ийыште йолташ ӱдырем-влак деч пален налынам. Проводник-влакын отрядышкышт каяш манын, йодмашым возенам. Кок тылзе тунеммеке, экзаменым кучен, мемнам Санкт-Петербург олаш колтеныт. Пашам ышташ тӱҥалмеке, нелырак лийын, но варажым тунемалтын. Тиде пагытыште Москва, Белгород, Ярославль, Архангельск, Новороссийск, Волгоград олалам ужаш пиал логалын. 2018 ийыште Абхазийыште лиймына годым проводник-влак отрядын кураторжо Лилия Рашидовна Иванова мыйым выездной группын командиржылан мыйын шогалтен.
– А молан лач проводник-влакын отрядыштым ойрен налынат?
– Шкемым тӱрлӧ вере терген онченам, но проводник-влакын отрядышкышт ушнымеке, чоныштем ласкалыкым шижым, тиде мыйынлык манын умыленам. Тылеч посна тиде сомыл тӱрлӧ оҥай верым ужын кошташ, у еҥ дене палыме лияш йӧным пуа. Тиде пашаште шкешотан романтике уло: поезд, станций, кӱртьыгорнын йӱкшӧ, а кас ӱжараже могай…
– Диана, спортын могай видше чонетлан утларак лишыл?
– Марисола школышто кумшо классыште тунеммем годымак куштылго атлетикылан шӱмаҥынам. Тыгак вольной кучедалмаш дене занятийыш коштынам. Кудымшо классыште тунемме годым, операций деч вара, врач-влак спорт дене кылым кӱрлаш кӱштеныт. Ныл ий эртымек, нигӧм колыштде, угыч куржталаш тӱҥалынам. Марий кугыжаныш университетыште 2-шо курсышто тунеммем годым полиатлонист-влак тӱшкаш ушненам. Шуко таҥасымашлаште шке вием тергенам, ече денат коштынам. Кок ий ончыч пулвуем эмгатенам, сандене куржтал кертын омыл. Тыге шкаланем вес йогыным ойырен налынам.
– Шкендым тӱрлӧ вере тергет. Могай корным ойырен налнет?
– Кызыт тидлан вашмутем уке, шонем эше. Но чонем проводник пашаш ӱжеш. Мый «Толкын – тиде илыш» девиз дене илем. Садланак, очыни, спорт да проводник паша илышыштем кугу рольым модын.
Е.Ёлкина
