ТАЧЕ ЯЛЫШТЕ ЯЛОЗАНЛЫК

Тиде кечылаште кок пачаш чулымрак тыршаш перна

«Тиде кечылаште кок пачаш чулымрак тыршаш перна»,  маныт Кужэҥер районысо «Искра» ялозанлык артельын мланде пашаеҥже-влак.

   Кораксола ял воктенысе пасушто МТЗ-82 тракторыш пижыктыме сеялкан агрегат пашам икшырымын ыштен, ик йыр почеш весым ыштен. Корно воктенак урлыкашым да ӱяҥдышым кондышо ГАЗ-53 кок автомашина шоген. Водитель-влак, сеялке ярсымеке, тунамак машинаштым агреагат деке лишемденыт да ӱдышӧ-влаклан ведра дене опташ полшеныт. Теве лач тиде татыште ме механизатор, водитель да ӱдышӧ-влак дене мутланышна. Жап пеш шыгыр, кажне минутшо шерге.

   – Ме тений пасушко 6 майыште лекна, Йӱледӱр гыч тӱҥалын, тиде могырыш ӱден толына, – каласкала ынде ятыр жап колхозышто водительлан тыршыше В.Данилов. – Тидын деч ончыч шӱльӧ ден викым ӱдышна, тыгак Купсола ял воктене шожым вераҥдышаш пасу ямде. Тыште ӱден пытаренат, тушко куснена. Вара Кугу Лаждӱр велнысе пасушко куснена. Туштат мландына шагал огыл уло.

   Виталий Николаевич шочынжо Эҥыжсола ялеш, тыштак ила. Кажне шошо ага годым ӱдышаш урлыкашым пасушко конда, а уржа-сорла тургым тӱҥалмеке, КЗС-ыште тырша, эрыктыме да коштымо пырчым левашлашке шупшыкта. Тудын мутшо почеш, пырчым эрыктен-коштымо комплексым тӱрыс ачаленыт, ынде весым чоҥаш палемденыт. Вет озанлыкыште мланде ий еда ешаралтеш, ончычсо пошкудо колхоз-влакын пасуштым артель арендыш налеш. Пырче ешаралтеш, сандене эрыктен-коштымо куатат кугемшаш.

   Пасу фермылан пашам ышта манме шулдыран мут кызытсе пагытланат  келшен толеш. Вет тиде колхоз ӱмаште да тений кок у фермым пашашке колтен, кызыт эше кок вӱта чоҥалтеш. Икымшыже родильный отделений лиеш гын, весыштыже презым ашнаш тӱҥалыт. Вольык шукемшаш, тугеже фуражлык пырчат шуко кӱлеш лиеш. Озанлык пырчым вольыклан пукшышашым веле огыл ситара, тыгак ятыр ужашым ужалаш ончен кушта.

   Ӱдышӧ агрегатын механизаторжо Г.Морозоват озанлыкыште ынде ятыр ий тырша, кугу опытан. Тудлан ий еда урлыкашым вераҥдаш ӱшанат. Ончычшо колхозышто комсомол организацийымат вуйлатен.

   – Мыланна пашам ышташ чыла йӧн уло, –манеш Геннадий Алексеевич. – Тыршет гын, лектышат куандара. Теве кодшо ийын чапле шурным ончен куштенна ыле. Теният кодшо ийысе деч ынена мӧҥгешт. Лачак игече гына туткарыш ынже пурто ыле. Теве кызыт моткоч шокшо да ояр игече шога. Чыла урлыкашым ме ӱяҥдыш дене гына ӱдена. Йӱрым моткоч вучена.

   Тиде гана ӱяҥдышым пасушко автомашина дене Александр Поликаропов шупшыктен. Такшым тудо гараж вуйлатыше, но водитель укелан кӧра машинам виктараш келшен. Озанлыклан полшаш молгунамсе семынак Параньга районысо Олор ял гыч предприниматель В.Романовын тракторжо-влак толыныт. Нуно мландым пушкыдемдаш полшат.   

   Сеялкыште урлыкашым да ӱяҥдышым эскераш самырык еҥ-влак С.Светлаков ден А.Романов толыныт. Нуно ончычшат тиде пашам шуктеныт, тиде ганат тореш лийын огытыл.        

   Тиде колхоз кодшо ийын вич тӱжем марте гектар кумдыкеш шурным ончен куштышо озанлык-влак коклаште  кокымшо верыш лектын ыле. Кокияш поснак чот куандарен. Теве уржа гектар еда 36 центнер дене лектын гын, кокияш шыдаҥ – 53 центнер дене. Икияшат куандарен.

   Эрлашыжым тиде агрегат шож пасушто тыршыш, кас велеш ӱден пытарыш. Почешыжак нурыш мландым лаптыртыше агрегат лектын ыле. Икманаш, пасу паша радамын шукталтеш.

   В.СМОЛЕНЦЕВ

   Авторын фотожо   

 

 

Опубликовать в Одноклассники

Добавить комментарий