СОЦИАЛ ИЛЫШ

Тергет гын веле рашемдет

«ОНФ-ын молодёжкыжо» команде пеҥгыде коммунал шӱкшакым погымо да лукмо у системын пашажым Йошкар-Олаште Рябинин, Волков, Первомайский уремласе кудывечылаште да Витаминный изуремыште терген. Тӱҥ налмаште, сӱрет начаржак огыл: регионысо оператор погынышо торым жапыштыже луктеш, пластикым опташ лӱмын контейнерым вераҥден, у йоҥгытымат ешарен шынден, но ситыдымашат ятыр: кок площадке ончылан лишыл пӧртыштӧ илыше-влак машинаштым шогалтен коденыт (тидыже мусоровозлан контейнер деке лишкырак шогалаш чаракым ышта), а Волков уремыште гын 2-шо №-ан поликлиникын «поснак лӱдыкшӧ тор» манын возыман йоҥгытшо ончылан пачерым олмыктымо деч мо кодшыжым орален оптеныт, эсогыл тошто шкафым, кроватьым луктын шынденыт. Тыгай шӱк пеҥгыде коммунал торлан ок шотлалт, сандене тудым виктарыше компанийлан але собственник-влакын товариществыштлан полигоныш шке кӱшешышт лукташ логалеш. Мут толмашеш, у правил почеш, регионысо оператор – «Благоустройство» ООО – шӱкшакым контейнер гыч веле кораҥда, площадкыш оптымым ТСЖ але виктарыше компаний-влак поген налыт.   

Шӱкым погымо да лукмо у системе дене шке пӧртыштӧ илыше-влак йӧршын гаяк огыт келше. Мутлан, Первомайский уремыште 49-ше №-ан пӧртым чоҥаш тӱҥалме марте тиде кундемыште илыше-шамыч торым погымо контейнерым иканат ужын огытыл, тиде бункержымат строительный шӱкшакым опташ гына вераҥдыме. Тале мардеж тарвана гын, ӱмбалне кийыше куштылгырак шӱк ала-кушко шумеш чоҥештен кая але кӱза. Тудым иктаж-семын петыраш гын, сай ыле.

Витаминный изуремыште илыше-шамычат счёт почеш молан тӱлышашыштым огыт умыло: услугылан квитанций толын, а контейнер нигуштат уке. Йошкар-Ола администрацийын да регионысо операторын еҥже-влак шӱкым погымо йоҥгытым Чайкина уремышке вераҥдыме маньыч, но тудым кычал кайышна гын, нимом ышна му… Тиде ситыдымашым лишыл жапыште шотыш кондаш сӧрышт.

– Озанлыкыште погынышо кагазым йӱлалтем, пакчасаска шӱмым, кодшо кочкышым монь компост ораш оптем да тиде йӧн дене налме ӱяҥдышым сад-пакчалан кучылтам, калай атым металлоломыш оксала сдатлем. Йӧрдымӧ шӱкшакемже пычырик веле погына… Капка ончыланем посна бакым шындат, мый тудым тич темем, да тиде шӱкшакым регионысо оператор наҥгая гын, счёт огыл, а факт почеш куанен тӱлем ыле… Мыйын шонымаште тиде услугылан акым чот кӱзыктымӧ, – манеш В.Христолюбов.

Рейдым иктешлыме годым ОНФ-ын чолга еҥже-шамыч шӱкшакым погымо да лукмо у системыште ситыдымаш-влакын улмыштым, но нуным шотыш кондаш лиймым палемденыт.

М.ИВАНОВА

Опубликовать в Одноклассники

Добавить комментарий