МАРИЙ ТӰНЯ

Тек тиде эр ӱжара пиалым Пыжампаллан сӧра

Йырым-йыр — пӧрш… Юалге, но свежа… Пӱртӱсын ӧрыктарыше тиде моторлыкшым шукертсек шып, вашкыде, тыглай гына, но йӧратен ончен шоген омыл. Кажне лышташыште, кажне укшышто, шудышто ала-мыняр шӱдӧ, уке-уке, тӱжем-тӱжем дене тыгыде пырче! Тӱрлӧ тӱсан шонанпыл гай коймышт дене нуно тысе вер-шӧрым палаш лийдымын да чоным сымыстарышын вашталтеныт. Умылтараш лийдыме ю вийже дене кажне ий пырче йырым-йырысе чыла илышылан пуйто шып да тунамак пеҥгыдын ойла: ончыкылык мемнан кидыште… 

Изи Тоншайысе «Рублёвко»

Таче эрдене шӱлашак куштылгыс! Кроссовко подош дене кышт-кашт тошкалын, асфальт дене эркын куржам. Изи Тоншай «Рублёвко». Оҥай, туге? Тыгай шонымашыже кӧн ушышкыжо толын пурен, маныда? Моло огыл, Слава Теркинын. Шке уремже нерген черетан сюжетемын геройжо тыге мане: «Кум ий ончыч тыште трактор-шамыч пижыныт…» А кызытше мо? Кызыт Тоншайыште (Угарман кундемын райрӱдыштыжӧ) илыше кажне гаяк еҥ ты «Рублёвкыштет» изи падыраш мландыжымат руалтен налнеже. А вет Изи Тоншай ала-кунам марий ял лийын. Ынде тудо — коттедж посёлко. Шке элитыжат уло. Но шке шотан улмыжым садак йомдарен огыл, арален коден кертын. Уна, каваш эркын нӧлталтше кечын йошкар йолжо шӧрын кайыше оралте-шамычлан пуйто у тӱсым пуынеже. А нуныжын пырняштым жап йӧршынат ок чамане — кажне ийын шемемда да шемемда. Ик пӧрт поснак чонышкем логале. Моло дене таҥастарымаште поснак «шӱлыканла» коеш. Ӱмбакем ӱшандымын ончышо окна. Куштыра дене темше кудывече. Пӱгырген тайналтше изи капка. Пӧртшат пуйто шукертак колен. Но уке-е, йӧрлаш тӱҥалше тӱньык гыч ошалге шикш лектешыс — оралтет эше ила улмаш, а чевер кечыйол тудлан пуйто вийым пуа. Эх, чонемланат сайын чучын колтыш… Чылажак тыште йомын огыл аман…
Ужат, Тоншай районысо тӱвыра пӧртыштӧ йӱк-йӱан шокта. Черетан куштымашым мотор ӱдыр-влак фойештак репетироватлат. Коридор мучко гармонь йӱк шарлен. Йӱкшӧ тугай палыме, тугай лишыл, санденак тудын велыш йолем шкак тарваныш. Семӱзгарым Сергей Огурцов «модыкта» улмаш. Тыштак Слава Теркинетат, шовыч-шамычым пидаш полша. «Чевер кецын» ӱдыржӧ-влак сценыш лекташ ямдылалтыт. Икте-весе дене мутланымаштышт уке-уке да марий шомак-шамыч шоктат. Но мо нерген ойлат — трукышто умылаш йӧсӧ, йӱдвел-эрвел могырысо кутырымашет ойыртемалтшак, туге гынат моткочак лишыл. Чаманаш гына логалеш, тыштат шочмо йылме эркын дене йомеш. Молан? Школышто тунемме книгам титаклыман огыл, титаканже ме, кугыеҥ-влак, улына — ешыште марла огына мутлане.

Кумданрак — «Марий Эл» газетын
2017 ий 21 октябрьыште лекше номерыштыже лудын кертыда.

Д.Речкин.
Г.Кожевникова марлаҥден

Опубликовать в Одноклассники

Добавить комментарий