КУЛЬТУР ДА ИСКУССТВО

«Театр – И.Ямбердын творчествыштыже»

16 сентябрьыште Республикысе сӱрет сымыктыш тоштерыште Российын сулло сӱретчыже Иван Ямбердовын персональный выставкыже почылтеш.

«Театр – И.Ямбердын творчествыштыже» выставке М.Шкетан лӱмеш Марий национальный драме театрлан пӧлеклалтеш. Ты театрыште Ямбердэ – «Мӱкш отар» (С.Чавайн), «Тулык ава» (Л.Яндаков) спектакль-влакын художник-постановщикшылан шотлалтеш.

Сӱретче 35 ий жапыште театр темылан пӧлеклалтше ятыр сӱретым ыштен. Мутлан, Йошкар-Олан 400 ияш лӱмгечыжлан тудо «Праздник на площади» пашам ямдылен.

Иван Михайлович 1976 ий гыч республикысе веле огыл, регионысо, всероссийский да тӱнямбал выставкылаш радынаже-влакым ончаш луктын. Персональный выставкыже-влак Эстонийыште, Финляндийыште, Германийыште, Москошто венгр тӱвыра рӱдерыште эртеныт. Тудын пашаже-влак тӱня мучко тоштерлаште да частний коллекцийыште улыт.

Выставке 16 шагатлан почылтеш.

А.БАЙКОВА

Опубликовать в Одноклассники

Добавить комментарий