30 май гыч 1 июнь марте Ижевскыште «Театр и дети» фестиваль-конкурс эрта. Тушко Российын тӱрлӧ регионжо гыч йоча да самырык-влакын национальный театр коллективышт ушненыт.
Марий Эл гыч «Воштончыш» образцовый музыкально-драматический театр каен. Удмурт кугыжаныш национальный театрын сценыштыже марий ӱдыр-рвезе-влак Валерий Якимовын пьесыж почеш шындыме «Кинда-Кунда» спектакльым ончаш да аклаш луктыт.
Палемдыман, «Воштончыш» театрыш кызыт 9 икшыве коштеш. Тудын художественный вуйлатышыже, режиссёржо — Марий Элын калык артистше Светлана Никитина.
А.Байкова
