КУЛЬТУР ДА ИСКУССТВО

«Театральный Йошкар-Ола»

Республикысе театр коллектив-влаклан тыгай фестиваль 19-27 мартыште эрта.

Ты гана нуно 11 спектакльым модын ончыктат.

Мероприятий Э.Сапаев лӱмеш опер да балет академический театрыште «Бахчисарайский фонтан» балет дене почылтеш. Тыштак 24 мартыште «Риголетто» опер лиеш.

Республикысе курчак театр 20 мартыште У ий шӱлышан «Снеговик-почтовик» йомакым, а М.Шкетан лӱмеш Марий национальный драме театр «Ший Пампалчым» ончаш темла.

Марий самырык театр 21 мартыште «Ӱмыр пелаш», Г.Константинов лӱмеш академический руш драме театр «Бабье лето», а Республикысе курчак театр «Крокодил» спектакльлам темлат.

22 мартыште Курыкмарий драме театр М.Шкетан лӱмеш театрыш «Свет далёкого счастья» постановкым конда.

23 мартыште эн ончычак Марий самырык театр «Похождение Чичикова, или Мёртвые души», а кастене руш драме театр «Вечера на хуторе близ Диканьки» комедий-влакым ончыктат.

Марий драме театрын фестивальыш лукмо вес спектакльже «Окса тул» маналтеш. Тудым 25 мартыште ужаш лиеш.

Фестиваль 27 мартыште мучашлалтеш. Й.Кырла лӱмеш национальный театр премий дене палемдалтше-влакым Э.Сапаев лӱмеш опер да балет театрыште саламлаш тӱҥалыт.

А.БАЙКОВА

Опубликовать в Одноклассники

Добавить комментарий