СПОРТ

Таҥасат, сеҥышыш лектыт

«Виктория» спорт  школын спортсменже-влак Марий Элын чапшым X теле спартакиадын кокымшо этапыштыже араленыт.

Таҥасымаш 21-25 январьыште Удмурт Республикыште  (Ижевск) эртен. Ече дене сборный командыште А.Шабалин, К.Рожков. А.Сапаров, А.Подыганов, П.Стрелец, Ю.Морозова, Е.Якимова, А.Зайкова, Ю.Падыганова лийыныт.

Шке тӱшкаштыже эн сай результатым Александр Шабалин (тренерже С.Кугергин) ончыктен. Рвезе эрыкан йӧн дене лу километрым куржын эртен, пелефиналыш лектын. Ӱдыр-шамыч коклаште эстафетыште, тыгак эрыкан йӧн дене таҥасымаште Елена Якимова (Н.Александров) ойыртемалтын. Юл кундем федерал округышто 13 команде коклаште Марий Эл гыч ечызе-влак кудымшо верым налыныт.

А.Шабалин нерген поснак палемдыме шуэш. Рвезе пытартыш жапыште сай результатым ончыкта. Мутлан, ўмаште «Российын ечыгорныжо» тӱшка таҥасымаште шке ийготанже-влак коклаште икымше верым налын. Моло  таҥасымаште эреак призёр радамыш лектеш.

Ӱмаште Александр Российын 30 эн тале спортсменже-влак коклаш логалын. Ече дене всероссийский таҥасымаште эрыкан йӧн дене 7,5 километр кужытышто 28-ше лийын.    

Е.ЭШКИНИНА

Опубликовать в Одноклассники

Добавить комментарий