3 августышто Марий Элын Пӱртӱс поянлык, экологий да йырым-йырысе средам аралыме министерствыже шордым, ирсӧснам, маскам сонарлаш разрешенийым пуэдаш тӱҥалеш.
Министер Владимир Шутовын палемдымыж почеш, тачысе кечылан разрешенийым пуымо законный йӧнлан «илыше» черет гына шотлалтеш. Кеч тиде пеш йӧнанжак огыл, да эреж годым сонарзе-влакын шонымышт семын ок лек. «Туге гынат, кызытсе правил ден нормым шотыш налын, лач тиде системе министерствын пашаеҥже-влакым разрешенийым блат деч посна пуэдымаште титаклен кертме деч утарен кода», — ойла министр. Сандене сонарзе-влакым ты шотышто умылаш йодеш.
Но чолгарак сонарзе-влак, пырля ушнен, шкештак разрешенийым налаш манын йодмашым пуымо шотышто спискым чумыраш тӱҥалыныт. Тидыже Инернетысе социальный сетьла гоч рашемын. Но министерствын специалистше-влак тыгай спискым ыштымылан мутым огыт кучо, сандене чыла ответственность тудым шке гыч ыштыше-влак ӱмбаке возеш, умылтарат министерствыште. Молан манаш гын садак кажне йодмашым посна ончаш тӱҥалыт. Тыгай официальный огыл черетым ыштымаш нимогай гарантийым ок пу. Мутлан, кодшо ийынат министерствыш таганан янлык да маскам сонарлаш разрешенийлан 454 йодмаш пурен гын, 175 еҥжылан отказыме. Кажне кумшо сонарзе разрешенийым налын огыл, лектеш.
«Пагалыме сонарзе-влак! Мемнан системын начаррак улмыжым ме шкежат умылена, санденак министерстве Марий Эл Республик Правительствыш сонарзе-влаклан разрешенийым пуымо шотышто у радамым пеҥгыдемдаш кӱлмӧ нерген темлымаш дене лектын. Мемнан шонымаште, разрешенийым сонарлык поянлыкнам кугемден, арален, виктарен толмо пашаште сонарзе-влакын надыр коэфицитентыштым шотыш налын палемдыман. Сандене лишыл жапыште разрешенийым налме йӧн саемеш манын ӱшанен кодына», — палемда Владмир Шутов.
С.Носова.
