Жап эмла, чыла ойгым мондаш полша манын ойлат. Ала… Можыч… Можыч, илыш йогынын ик татланат чарнен шогалмыжлан кӧра тыге чучын колта, но чучеш веле – чонын эн пычкемыш, эн шыгыр лукышкыжо пызнен шичше шижмаш жапын-жапын шкенжым палдара да пӱсӧ «умдыж» дене шӱмым туге кералеш, эсогыл пуйто чылажат теҥгече гына лийын… а вара адак шылеш, но жаплан гына… Тыге ӱмыр мучко. Илышетым кеч-кузе вашталташ тыршет, кеч-куш кает гынат, тиде шижмаш эре пеленетак. Уке, жап ок эмле, ойгымат мондаш ок полшо – тудо кеч-могай лиеш гынат… Туге гынат илыман, илыман йырет пӧрдшӧ да тыйын кажне ошкылетым туран эскерыше кандаш мужыр шинча верч. Йӧратыме пелашыжын ош тӱня дене вучыдымын чеверласымекыже, Кужэҥер район Тумньо ялын эргыже, район администрацийын ялозанлык отделжын тӱҥ специалистше ВАСИЛИЙ РЫБАКОВ тыгак ыштен: илен йочаже-влак верч да нуным шкетынак ончен куштен йолӱмбаке шогалтен. Тиде кечылаште Марий Эл Республикын Правительстве пӧртыштыжӧ регион вуйлатыше А.Евстифеев тудлан «Родительская слава» орденын медальжым кучыктен.
Тыгодым тудым могай шижмаш авалтыш, маныда? Айдемын чонышкыжо пураш ок лий, шижмашат шинчалан ок кой, садланак тиде куанле тат деч вара икымше йодышем лач тыгай лие. Василий Иванович тыге каласыш:
– Шижмашыже… Тыгай наградым налаш – пеш кугу куан. Мыламже ончычшо «Родительская слава» орденлан представлений лийын, а тудын дене шым йочам ончен куштышо ача-авам палемдат, мыйже нунын коклаш логалын ом керт улмаш – шкетын кандашым онченам… Кузе манаш, Василий Тёркин чоскам манмыла «Молан мылам орден? Медалят йӧра…»
Пӧръеҥ пытартыш ойжо дене мом каласынеже ыле – тогдаяш неле огыл, но, мом ыштет, чылажат кугу тӧра-влак дене кылдалтын. А вет, шоналташ гын, тудлан медальым огыл, орденым кучыктыман ыле да орденжат ок сите – Василий Иванович гай айдеме эшеат кугу наградым сулен. Ида тургыжлане, тиде кугу наградыже тудын уло – икшывыже-влак. Эн кугулан, Ольгалан, У ий деч ончыч 30 ий темын. Кызыт тудо Медведевысе «Колокольчик» йочасадыште кугурак воспитательлан тырша. Ваня эргыжлан – 27 ий, «Шойбулакский» комплексыште зооинженерлан пашам ышта. Аня майыште 26 ийым тема, МВД системыште тырша. Снежана – психотерапевт, Краснодар олаште ила. Моло нылытше кӱшыл образованийым налеш, шкан келшыше специальностьлан тунемеш: Игорь – «Волгатехын» кумшо курсыштыжо, Наташа – Кировысо медуниверситетын лечебный факультетшын кокымшо курсыштыжо, Ольга – ончыкылык стоматолог, Кировыштак икымше курсым пытара, Наташа – МарГУ-н икымше курсыштыжо.
Кумданрак — «Марий Эл» газетын
2018 ий 20 апрельыште лекше номерыштыже лудын кертыда.
Г.Кожевникова
