«Пища жизни» поро кумыл фондын волонтёржо-шамыч тӱнен илыше-влакым шуматкече еда пукшат. Мутлан, эртыше акцийыште Йошкар-Оласе Панфилов ден Петров уремлаште 32 еҥлан 70 порций пакчасаскан шемшыдаҥ пучымышым, кӱэштме изделийым, шке пыштыме киндым пуэденыт. Тылеч посна эше олма да шудо чайым темкален йӱктеныт, кажне еҥлан шкем аралыме маскым темленыт.
— Волонтёрна-влак шокшо кочкышлан толшо калыкым огыт ойыркале, чыла еҥым пукшат. Айдеме таче ик порций кочкышлан толеш, эрла илышыштыже вашлиялтше неле йыжыҥым сеҥен лектеш да йӧсӧ жапыште полшымылан таушта, можыч, весыланат полшаш тӱҥалеш, — маныт поро кумыл акцийын организаторжо-влак.
Акцийыш кажне еҥ ушнен кертеш. Тидланже продуктым, ик гана пайдаланыме кӱмыж-совлам, контейнерым, стаканым, целлофан пакетым кондымыжат сита. Тылеч посна кочкышым автомашина дене кондыштарен, пуэден кертеш але 2202 2018 0628 5843 №-ан сберкартыш (налшыже: Карина Владимировна К.) оксам колтен сеҥа. Тыгодым «поро кумыл надыр» манын ончыкташ гына мондыман огыл.
М.ИВАНОВА
