ИЛЫШ ЙЫЖЫҤ

Тауштена да вуйнам савена

24 февральыште Кугу Отечественный сарын ветеранже Иван Алексеевич Алексеевлан 103 ий темын.

Волжский районысо Пезмучаш Корамас ялыште шочын-кушшо землякна кужу илыш корныштыжо шуко мом ужын… Ачажын колымыж деч вара аваже кугу озанлыкыште ныл эрге дене кодын, сандене Иванлан изинекак шуко неле пашам ышташыже логалын. Рвезе виян, чулым да чолга кушкын. Кандаш классым тунем пытарымыж деч вара верысе колхозын пашашкыже ушнен. 1938 ий июньышто тудым Совет Армий радамыш налыныт, да И.Алексеев 4-ше Архангельский теҥыз пограничный отрядыш логалын, корабльыште сигнальщиклан служитлен. Сусыргымыж деч вара серыш, сухопутный отрядыш, кусареныт. Иван Алексеев Ош теҥыз сер мучко Архангельск гыч Мезень марте йолын ошкыл эртен.

А вара сар тӱҥалын… 1942 ий августышто И.Алексеев ВКП (б) радамыш ушнен. 1943 ий апрельыште марий рвезым пограничный батальонын составше дене 3-шо Белорусский фронтыш колтеныт. Тушто тудо снайпер лийын, шуко фашистым пытарен.

Шочмо Архангельский теҥыз погранотрядышкыже пӧртылмек, Иван Алексеевич портышто союзник-влакын ленд-лиз программе дене кондымо сатуан суднылаштым оролен. Сеҥымашым Таллиныште чекым оролымыж годым вашлийын. Сар деч вара ик ий гыч демобилизоватлалтын.

Иван Алексеевичым «За победу над Германией в Великой Отечественной войне 1941-1945 г.г.» медаль, II степенян Отечественный война орден да Кугу Отечественный сарын датылаж дене кылдалтше шарнымашан моло медаль дене палемденыт.

   Демобилизаций деч вара тудо шочмо ялышкыже пӧртылын, ӱдырым налын, ешым чумырен. Икмыняр жап гыч Иван Алексеевичым колхозым вуйлаташ шогалтеныт. А 1961 ийыште Алексеевмытын ешышт Йошкар-Олашке илаш куснен. Суртоза Полупроводник прибор заводыш слесарь-сборщикын ученикшылан пурен, вара диспетчерлан, йӱд дежурныйлан ыштен. Тиде заводышто чумыржо 30 ий тыршен, да 1990 ийыште коммунистический пашан ударникше, пашан ветеранже И.Алексеев сулен налме канышыш каен.

 Иван Алексеевичым шочмо кечыж дене шуко еҥ саламлен. Йошкар-Ола администрацийын еҥже-влак ветеранлан «75 лет Победы в Великой Отечественной войне 1941-1945 г.г.» юбилейный медальым, шергакан пӧлекым да пеледыш аршашым кучыктеныт. Лӱмгече озат кӱсынеш кодын огыл: уна-шамычын толмыштлан нимучашдымын куанен, саламлыме мутыштлан, пӧлекыштлан, поро тыланымашыштлан уло чон дене тауштен.

Меат пагалыме Иван Алексеевичым 103 ийым темымыж дене шокшын саламлена, пеҥгыде тазалыкым, чон куаным да тыныс илышым тыланена. Тулан неле жапыште лӱддымылыкым, пеҥгыдылыкым да чолгалыкым ончыктымыжлан, сар деч вара Российын да Марий Элын волгыдо ончыкылыкышт верч лым лийде тыршымыжлан, мыланна тыныс илышым пӧлеклымыжлан ончылныжо вуйнам савена.

Фотом Йошкар-Ола

администрацийын

сайтше гыч налме

М.ИВАНОВА

Опубликовать в Одноклассники

Добавить комментарий