УВЕР ЙОГЫН

Таклан огыл «Уш патыр» маныт

Т.Евсеев лӱмеш национальный тоштерыште «Тӱнямбал кӱкшытан марий археолог» ончер почылтын. Тудо лӱмлӧ шанчызе Валерий Степанович Патрушевын 75 ияш лӱмгечыжлан пӧлеклалтын.

Валерий Степанович шке илышыжым финн-угор калык-влакын историйыштым да тӱвыраштым археологий могырым шымлыме пашалан пӧлеклен. Марий шанчыеҥ Российыштат ик эн ончыч археологий материал-влакым статистике могырым иктешлаш тӱҥалын. Тыглай еҥлан тидыже нимат огеш ойло, но ученый-влак тидым палемдат да аклат. А коллегыже, тыгак тыглай илышыште йолташыже, лишыл еҥже-влак кузе пагалымым ончер почмо годым ужна. Тудын пашаче, чыла вере шуаш, шуко палаш, шке шинчымашым эре нӧлташ, илыш дене тӧр каяш тыршыше, сай ача, коча улмыжым шукын палемдышт. Ятыр поро шомак йоҥгалте. Тудын фамилийжым марий йылмым лончылымо гоч лӱмло сӱретче Иван Ямбердовын умылтарымыже келшыш. «Патрушев «Уш патырым» ончыкта»,- мане.

Валерий Степанович — Марий кугыжаныш университетын профессоржо, историй науко доктор, Российысе общественный калык академийын да Российысе Гумманитарный науко  академийын академикше, РФ-се кӱшыл профессиональный образованийын почётан пашаеҥже, Марий Элысе наукын сулло пашаеҥже, Марий Эл Республикысе кугыжаныш премийын лауреатше, «Фенно-Угрика» тӱнямбал ощество правленийын действительный, Кастрен ушемын, Финн археологий обществын членже да молат…

Тудо 400 научный пашам возен,  латкумытшо — монографий шмылымаш.  Российысе да 29 тӱнямбал научный мероприятийыште, археологий экспедицийлаште участвоватлен. Финляндийыште, Эстониийыште, Израильыште тудын лӱмжо сайын палыме. 25 ий наре  Финляндийысе  (Хельсинки, Оулу, Турку), Санкт-Петербургысо, Москвасе (МГУ), Озаҥысе университетлаште лекцийым лудын. Кызыт тудо Российысе военно- исторический академийын Озаҥысе пӧлкаштыже пашам ышта.

Тудым саламлаш Марий Элысе тӱвыра, печать да калык-влакын пашашт шотышто министрын алмаштышыже Александр Луничкин, республикысе Тӱвыра поянлыкым арален кодымо, пайдаланыме да оролымо шотышто управлений вуйлатыше Аурика Михеева толыныт ыле. Пашам пырля ыштыше колегыже, йолташыже, лишыл еҥже-влак саламленыт. Иван Ямбердов гын шке йолташыжлан тудым войзыман сӱретым пӧлеклыш.

Тоштер пашаеҥ, историй пӧлкам вуйлатыше Ольга Требушкова, пайрем озан тукым шӱжарже, выставке гоч тудын илыш корныжо, пашаже дене  палдарыш.  Валерий Патрушевын еш альбомжо гыч шуко фотографийым ужаш, кажныж дене кылдалтше историй дене палыме лияш йӧн лийын.

С.Носова.

нимкылаште: В.Патрушевым А.Луничкин саламла; И.Ямбердовын пӧлекше; В.С.Патрушев — Римыште лиймыж годым.

Опубликовать в Одноклассники

Добавить комментарий