Кумдан палыме да пагалыме доктор Александр Мясниковын 90 ийым вончышо аваже, Ольга Халиловна, кызытат кӱварым кид дене мушкеш да кажне кечылан куанен ила. Тудо тӱрлӧ ийготышто пиалан лийын кертмым шке примерже дене пеҥгыдемда. Илалше ӱдырамаш кызытат пашам ышта. Пациентше-влак тудын илышым йӧратымыжым, волгыдо шинчаончалтышыжым, поро шӱм-чонан улмыжым, ӱшаным пуэн моштымыжым куанен палемдат.
Ольга Мясникова ӱмыржӧ мучко эре иктаж-мом ышташ тырша. «Айдеме мыняр шуко жап яра шинча, тунар писын лунчырга. Книгам лудашат – кугу сомыл, тудо вуйдорыклан лушкаш эрыкым ок пу. Куптыргымо, давлений дене орланыме деч посна шоҥгемме годым эше вуйдорыкын клеткыже-влак пытат, – манеш Ольга Халиловна. – Кужу жап самырык лияш шонышо айдемын илышыштыже… жап ситышаш огыл! Мый лачшымак тыге илем. Шке жапыштыже кум пашаште тугай чот ноенам – мӧҥгӧ пӧртылмек, кудашдеак, кроватьыш йӧрлынам да тунамак мален колтенам. Эре иктаж-мом ургенам, пидынам, эре ала-кӧлан кӱлмым, ала-мом ыштен шуктыдымым шижынам, сандене ойгырен шинчаш веле огыл, черланашат жапем лийын огыл.
Кушмым да вияҥмым чарныше айдеме эркын-эркын шоҥгемеш. Биологический манме процесс 30-35 ияшынак лушкаш тӱҥалеш. Тидымак шотыш налын, шкем пенсийыш лекмеке огыл, а 30 ияш гычак эскерыман: калык дене кутырыман, уверым лончылыман, кроссвордым але вуйушым пудыратылше задачым решатлыман. Икманаш, чогашылым веле огыл, вуйдорыкымат вияҥден пеҥгыдемдыман.
Кызыт шагал огыл еҥ самырыкнекак писын ноя, сусыр начарын иланымылан вуйым шиеш, вашталтышым нелын чыта, илыш гыч кая… Кугезе айдеме эре чолга лийын, сандене шуко илен. Смартфон, компьютер дене шуко жапым йомдарыме, депрессий дене орланыме олмеш лучо кидпашам ышташ. Тудо чумыр организмлан пайдале, поснак вуйлан.
«Мом моштеда, чылажымат шке ыштыза – весым ида йод. Мый, мутлан, ӱмырем мучко име да крючок дене пижерге-носким веле огыл, салфеткымат, шальымат, кофточкымат, ӱстембалшартышымат кумылын пидам, – манеш Ольга Мясникова. – Тыгак у мутым, вес йылмым, почеламутым, молитвам тунемаш пайдале. Шанчызе-влак тидымат пеҥгыдемденыт: кайык мурым колыштшо-влак поснак шуко илат. Сандене пӱртӱс денат пеҥгыде кылым кучаш тыршыман».
М.Иванова
